مرکزنے ۱۶؍ ستمبر سے۲؍ اکتوبر تک اسکولوں میں مودی کے بچپن سے متاثر فلم دکھانے کا فرمان جاری کیا ہے، مرکز نے یہ بھی اعلان کیا کہ’’ `چلو جیتے ہیں‘‘ ۱۷؍ستمبر سے۲؍ اکتوبر تک ملک بھر کے سنیما گھروں میں دوبارہ ریلیز کی جائے گی۔

دی ہندو کی خبر کےمطابق وزارت تعلیم نے۱۱؍ ستمبر کے ایک خط میں سی بی ایس ای، کیندریہ ودیالیہ اور نودیہ ودیالیہ سمیت تین تعلیمی اداروں سے کہا کہ وہ۱۶؍ ستمبر سے ۲؍ اکتوبر کے درمیان اس فلم کی نمائش کا اہتمام کریں۔ وزارت اطلاعات و نشریات نے بھی اعلان کیا کہ’’چلو جیتے ہیں‘‘۱۷؍ ستمبر سے۲؍ اکتوبر تک ملک بھر کے سنیما گھروں میں دوبارہ ریلیز کی جائے گی۔ وزیر اعظم کی۱۷؍ ستمبر کو ہونے والی سالگرہ سے ایک ہفتہ قبل یہ ہدایت جاری کی گئی۔ خط میں کہا گیا کہ ’یہ (فلم) نوجوان طلبہ کو کردار، خدمت اور ذمہ داری کے موضوعات پر غور کرنے میں مدد دے گی۔ فلم اخلاقی استدلال کے لیے ایک نظیر  کے طور پر بھی کام کر سکتی ہے،اور ہمدردی،خود شناسی ،تنقیدی سوچ اور تحریک کے مقاصد پیدا کر سکتی ہے۔ 

یہ بھی پڑھئے: اسرائیل نے فلسطین نواز فلم ’’البحر‘‘ کو اوفیر ایوارڈ دینے پر فنڈنگ روک دی

دی انڈین ایکسپریس کے مطابق، خط میں کہا گیا کہ وزارت ’پریرنا‘ نامی ایک پروگرام بھی لا رہی ہے۔اخبار نے خط کے حوالے سے کہا کہ ’پریرنا پروگرام گجرات کے تاریخی ورنیکولر اسکول وڈ نگر سے چلایا جا رہا ہے، جو۱۸۸۸ء میں قائم ہوا تھا، وہی ادارہ جہاں سے وزیر اعظم نریندر مودی نے اپنا تعلیمی سفر شروع کیا تھا۔‘اس میں کہا گیا کہ اس پروگرام میں کہانی سنانا، اقدار پر مبنی سیشن، مقامی کھیل اور بصری تعلیم شامل ہیں۔مواصلات کے مطابق، پروگرام کے حصے کے طور پر فلم اسکریننگ کو ایک آلے کے طور پر استعمال کیا گیا تاکہ انسانی جذبات کو زندگی میں لانے میں مدد ملے‘۔اس میں مزید کہا گیا کہ ’چلو جیتے ہیں‘ کو باقاعدگی سے ’’پریرنا‘‘ پروگرام کے حصے کے طور پر دکھایا جا رہا ہے۔منگل کو، مرکزی وزارت اطلاعات و نشریات نے یہ بھی اعلان کیا کہ مودی کی زندگی کے ’ایک بچپن کے واقعے‘ سے متاثر ’چلو جیتے ہیں۱۷؍ ستمبر سے۲؍ اکتوبر تک ملک بھر کے سنیما گھروں میں دوبارہ ریلیز کی جائے گی۔ وزارت نے کہا کہ یہ فلم سوامی ویوکانند کے فلسفہ ’’بس وہی جیتے ہیں، جو دوسروں کے لیے جیتے ہیں‘‘ کوخراج تحسین ہے۔ اس میں کہا گیا کہ فلم ’نوجوان نارو کی کہانی بیان کرتی ہے، جو سوامی ویوکانند کے فلسفہ سے متاثر ہو کر اس کے معنی کو سمجھنے کی کوشش کرتا ہے اور اپنی چھوٹی سی دنیا میں فرق پیدا کرنے کی کوشش کرتاہے‘۔دریں اثناءپی وی آر آئی این او ایکس لمیٹڈ نے بھی اعلان کیا ہے کہ وہ۱۸؍ سے۲۴؍ ستمبر تک ’’چلو جیتے ہیں‘ ‘کی ہفتہ وار اسکریننگ کا اہتمام کرے گی۔