ہندوستان اور یورپ کے۲۷؍ ممالک کی اقتصادی و سیاسی یونین یورپی یونین (ای یو) کے درمیان آزادانہ تجارتی معاہدہ (ایف ٹی اے) پیر کو قومی دارالحکومت میں طے پا گیا۔ وزیر اعظم نریندر مودی نے منگل کو اس کا اعلان کرتے ہوئے اس معاہدے کو تاریخی قرار دیا۔

وزیر اعظم نے یہ اعلان گوا میں منعقدہ توانائی کے شعبے پر ہندوستان کی عالمی کانفرنس انڈیا انرجی ویک کے افتتاحی اجلاس سے خطاب کرتے ہوئے کیا کہ ’’مودی نے کہا کہ اپنی بات آگے بڑھانے سے پہلے میں ایک بڑے مثبت واقعے کا ذکر کرنا چاہوں گا۔ کل ہی ہندوستان اور یورپی یونین کے درمیان ایک بہت بڑا معاہدہ ہوا ہے۔ دنیا بھر میں لوگ اس کی چرچا مدر آف آل ڈیلز(اب تک کا سب سے بڑا تجارتی معاہدہ) کے طور پر کر رہے ہیں۔
انہوں نے کہاکہ ’’ یہ معاہدہ ہندوستان کے  ۱۴۰؍ کروڑ عوام اور یورپی ممالک کے کروڑوں لوگوں کے لیے بڑے مواقع لے کر آیا ہے۔ یہ دنیا کی دو بڑی معیشتوں کے درمیان ہم آہنگی کی ایک شاندار بنا ہے۔ یہ معاہدہ عالمی جی ڈی پی کے قریب ۲۵؍ فیصد اور عالمی تجارت کے تقریباً ایک تہائی حصے کی نمائندگی کرتا ہے۔ یہ معاہدہ تجارت کے ساتھ ساتھ جمہوریت اور قانون کی حکمرانی کے تئیں ہماری مشترکہ وابستگی کو بھی مضبوط بناتا ہے۔ 
قابلِ ذکر ہے کہ یورپی یونین ہندوستان  کا ایک اہم تجارتی اور اقتصادی شراکت دار ہے۔ سال ۲۵۔۲۰۲۴ء میں دونوں کے درمیان ۱۳۶؍ ارب ڈالر کی اشیاء کی تجارت ہوئی تھی۔ ہندوستان وہاں سے بنیادی طور پر مشینری، نقل و حمل کے آلات اور کیمیکلز درآمد کرتا ہے، جبکہ ہندستان کی جانب سے وہاں مشینیں، کیمیکلز، لوہا، ایلومینیم اور تانبہ جیسی بنیادی دھاتیں، معدنی مصنوعات، ٹیکسٹائل اور چمڑے کی اشیاء برآمد کی جاتی ہیں۔
وزیر اعظم نے کہاکہ  ساتھیو، ای یو کے ساتھ ہوا یہ ایف ٹی اے برطانیہ اور ایفٹا (یورپین فری ٹریڈ ایسوسی ایشن) کے ساتھ طے پانے والے معاہدوں کا تکمیلی کردار ادا کرے گا۔ اس سے تجارت اور عالمی سپلائی چین دونوں کو مضبوطی ملے گی۔ میں ہندوستان  کے نوجوانوں اور تمام ہم وطنوں کو اس کے لیے  مبارکباد دیتا ہوں۔ میں ٹیکسٹائل، جواہرات و زیورات، چمڑا اور چمڑے کی مصنوعات سے وابستہ ساتھیوں کو بھی مبارکباد دیتا ہوں۔ یہ معاہدہ آپ کے لیے نہایت معاون ثابت ہوگا۔

یہ بھی پڑھئے:یوم جمہوریہ کے موقع پر’’بارڈر ۲‘‘ کی زبردست کمائی

انہوں نے کہا کہ اس تجارتی معاہدے سے ہندوستان میں مینوفیکچرنگ کو تقویت ملے گی اور خدمات سے وابستہ شعبوں میں بھی مزید توسیع ہوگی۔ یہ ایف ٹی اے دنیا کے ہر کاروبار اور ہر سرمایہ کار کے لیے ہندستان  پر اعتماد کو مزید مضبوط کرے گا۔ قابلِ ذکر ہے کہ یورپی کمیشن کی صدر اُرسولا وان ڈیر لیین اور یورپی کونسل کے صدر انتونیو کوسٹا اس وقت ہندوستان میں ہیں۔ دونوں پیر کو یومِ جمہوریہ کی پریڈ میں مہمانِ خصوصی تھے۔

یہ بھی پڑھئے:یہ بھی پڑھئے:سعودی پرو لیگ: کرسٹیانو رونالڈو گول نہ کر سکے، پھر بھی النصر کی فتح

وان ڈیر لیین نے حال ہی میں داووس میں عالمی اقتصادی فورم (ڈبلیو ای ایف) کے اجلاس کے دوران دونوں فریقوں کے درمیان معاہدے پر اتفاق کے اشارے دیتے ہوئے کہا تھا کہ یہ معاہدہ مدر آف آل ڈیلز یعنی اب تک کا سب سے بڑا تجارتی معاہدہ ہوگا۔ انہوں نے کہا تھا کہ اس معاہدے سے ہندوستان  اور یورپی یونین کی دو ارب کی مجموعی  آبادی کا ایک بڑا اورکھلا بازار تیار ہوگا۔ اس معاہدے کی تفصیلات کا اعلان آج شام صنعت و تجارت کے وزیر پیوش گوئل کریں گے۔