شمالی کوریا کی وزیر خارجہ چوئے سن ہوئی نے جمعرات کو گروپ آف سیون (جی-۷؍)کی جانب سے ملک کے جوہری ہتھیاروں کے خاتمے کے مطالبے کو سختی سے مسترد کر دیا، اور اس بات پر زور دیا کہ پیانگ یانگ اپنے جوہری ہتھیاروں کو برقرار رکھنے اور ترقی دینے کے لیے پرعزم ہے۔

سرکاری خبر رساں ایجنسی کورین سینٹرل نیوز ایجنسی کے ذریعے جاری ہونے والے ایک بیان میں شمالی کوریا کی وزیر خارجہ چوئے سن ہوئی نے اس ہفتے کے اوائل میں پیرس میں جی ۷؍کے وزرائے خارجہ کے اجلاس کے بعد جاری ہونے والے مشترکہ بیان کی مذمت کی۔ جی ۷؍کے بیان میں شمالی کوریا کے جوہری ہتھیاروں اور بیلسٹک میزائل پروگراموں پر کڑی تنقید کی گئی تھی اور اقوام متحدہ کی سلامتی کونسل کی قراردادوں کے مطابق ملک کے ’’مکمل جوہری تخفیف‘‘ کے عزم کا اعادہ کیا گیا تھا۔

یہ بھی پڑھئے: چینی جاسوس تنازع پر ڈیموکریٹس کا ٹرمپ انتظامیہ سے این ویڈیا کا ریکارڈ محفوظ رکھنے کا مطالبہ

بعد ازاں چوئے نے کہا، ’’میں ہماری ریاست کے آئینی حق پر جی-7 کی شرپسندانہ تنقید کی شدید مذمت اور تردید کرتی ہوں اور جوہری ہتھیار رکھنے کے ڈی پی آر کے  کے پختہ عزم کا واضح ترین الفاظ میں اعادہ کرتی ہوں۔‘‘ انہوں نے شمالی کوریا کے جوہری ہتھیاروں کو قومی خودمختاری اور سلامتی کی سب سے مضبوط ضمانت قرار دیا۔
مزید برآں کوریا ٹائمز نے ان کے حوالے سے کہا، ’’ہمارا یہ فیصلہ اور موقف اٹل ہے کہ جوہری ہتھیار رکھنا ہمارے قومی خودمختار حقوق کو یقینی بنانے کی سب سے طاقتور ضمانت ہے۔‘‘ چوئے نے استدلال کیا کہ جوہری ہتھیاروں کا خاتمہ نظریہ اور عمل دونوں لحاظ سے ناممکن ہے، انہوں نے امریکہ اور اس کے اتحادیوں پر دہرا معیار اپنانے کا الزام لگایا جو اپنے جوہری ہتھیاروں کو برقرار رکھتے ہوئے شمالی کوریا کے جوہری پروگرام پر تنقید کرتے ہیں۔علاوہ ازیں انہوں نے پیانگ یانگ کی جوہری پالیسی پر تبصرہ کرنے کے جی ۷؍کے اختیار پر بھی سوال اٹھایا۔ انہوں نے کہا، ’’جی ۷؍کو دوسروں کے جوہری مسائل پر تنقید کرنے یا تبصرہ کرنے کا کوئی حق نہیں ہے۔‘‘ اس بات کا اعادہ کرتے ہوئے کہ شمالی کوریا اپنے جوہری ہتھیاروں کے پروگرام کو قومی خودمختاری کا جائز استعمال سمجھتا ہے، چوئے نے دعویٰ کیا کہ ایٹمی ہتھیاروں سے لیس ریاست کے طور پر ملک کی حیثیت جی ۷؍کی ’’اسٹریٹجک ناکامی‘‘ کو ظاہر کرتی ہے۔