ایک طرف مودی حکومت اتوار کو پیش کئے جانے والے مرکزی بجٹ کو عوام کے فائدے کا بجٹ بتارہی ہے۔ وہیں  اپوزیشن نے اس پر سخت تنقید کی ہے۔ سماجوادی پارٹی ،کانگریس ،  ٹی ایم سی ، سی پی آئی سمیت سبھی اپوزیشن پارٹیوں کی جانب سے تنقیدی ردعمل سامنے آیا ہے۔ جانئے کس نے کیا کہا؟

سماج وادی پارٹی کے صدر اکھلیش یادو نے بجٹ کو انتہائی مایوس کن قرار دیا اور کہا ہے کہ اس میں تعلیم، صحت، کسانوں اور خواتین کیلئے کوئی بندوبست نہیں کیا گیا ہے۔ اتوار کو بجٹ کے پیش ہونے کے بعد پارلیمنٹ کے احاطے میں نامہ نگاروں سے بات کرتے ہوئے اکھلیش یادو نے کہا،’’سب کیلئے  مناسب تعلیم کے بغیر ترقی یافتہ ہندوستان کا تصور کیسے کیا جا سکتا ہے؟ بجٹ میں تعلیمی شعبے کیلئےکچھ نہیں کیا گیا ہے۔‘‘ انہوں نے کہا کہ کوئی بتائے کہ عام لوگوں کو صحت کی بہتر سہولیات دستیاب ہوں، اس کیلئے بجٹ میں کیا کیا گیا ہے؟انہوں نے کہا کہ اتر پردیش جیسی بڑی ریاست میں تعلیم اور صحت کی حالت ایسی ہے کہ سرکاری اسکول بند ہورہے ہیں اور سرکاری اسپتالوں کی حالت بیحد خراب ہے۔ رکن پارلیمنٹ نے کہا کہ کسانوں کو راحت پہنچانے کیلئے بجٹ میں کچھ نہیں ہے۔ انہوں نے کہا کہ خواتین کے لیے روزگار اور ان کے دیگر مسائل کے حل کے لیے بجٹ میں کوئی التزام نہیں کیا گیا ہے۔ انہوں نے کہا کہ یہ بجٹ۵؍ فیصد متمول آبادی کے مفادات کو مدنظر رکھتے ہوئے تیار کیا گیا ہے۔ ملک کی۹۵؍ فیصد آبادی کے لیے بجٹ میں کچھ نہیں کیا گیا۔بجٹ میں حکومت کے کچھ قریبی لوگوں کو فائدہ پہنچانے کے لیے التزامات کیے گئے ہیں۔ 

کانگریس نے مرکزی بجٹ۲۷۔۲۰۲۶ء پر ردعمل ظاہر کرتے ہوئے اسے مکمل طور پر مایوس کن اور پھیکا قرار دیا ہے۔  کانگریس کے مواصلاتی شعبے کے انچارج جے رام رمیش نے بجٹ پر ردعمل ظاہرکرتے ہوئے اتوار کو سوشل میڈیا پر لکھا کہ اگرچہ بجٹ دستاویزات کا تفصیلی مطالعہ ابھی باقی ہے لیکن بجٹ تقریر کے صرف۹۰؍ منٹ بعد ہی یہ واضح ہو گیا ہے کہ بجٹ کے حوالے سے جو ماحول اور تشہیرکی گئی تھی یہ اس پر پورا نہیں اترتا۔ انہوں نے کہا کہ یہ بجٹ نہ تو کوئی نئی سمت دکھاتا ہے اور نہ ہی کسی بڑے تغیر یا تبدیلی کا اشارہ دیتا ہے۔ رمیش نے بجٹ تقریر کو مبہم اور غیر شفاف قرار دیتے ہوئے کہا کہ اس میں اہم پروگراموں اور منصوبوں کیلئے بجٹ الاٹمنٹ کے بارے میں کوئی واضح معلومات فراہم نہیں کی گئیں۔ حکومت نے حقیقی مسائل سے توجہ ہٹانے کی کوشش کی ہے اور عام لوگوں کو مایوسی کا سامنا کرنا پڑا ہے۔ 

بہوجن سماج پارٹی (سپریمو) مایاوتی نے کہا ہے کہ بجٹ میں منصوبوں، پروجیکٹوں اور وعدوں کے نام چاہے جتنے بڑے ہوں، اصل کسوٹی یہ ہے کہ ان کا فائدہ زمینی سطح پر عام لوگوں تک کس حد تک پہنچتا ہے۔ انہوں نے کہا کہ سماج کے مفاد کی بات کرنا صرف کافی نہیں بلکہ درست نیت کے ساتھ ان پر عمل درآمد بھی اتنا ہی ضروری ہے۔ اپنے سوشل میڈیا اکاؤنٹ پر جاری بیان میں مایاوتی نے الزام عائد کیا کہ مرکزی حکومت کا بجٹ سرمایہ دارانہ سوچ سے متاثر دکھائی دیتا ہے، جس میں بڑے صنعتکاروں اور مالدار طبقے کو ترجیح دی جارہی ہے، جبکہ غریب، دلت اور بہوجن سماج کی توقعات پیچھے رہ جاتی ہیں۔حکومت کی پالیسی اور نیت کا اندازہ اس بات سے ہونا چاہیے کہ واقعی غریب اور محروم طبقات کی زندگی میں کتنا مثبت بدلاؤ آیا ہے۔ انہوں نے کہا کہ خود کفیل ہندوستان کی بات اسی وقت بامعنی ہوگی جب سرکاری شعبے کو مناسب اہمیت دیتے ہوئے آئین ساز ڈاکٹر بھیم راؤ امبیڈکر کے فلاحی آئین کی روح کے مطابق ٹھوس اقدامات کیے جائیں۔ مایاوتی نے یہ سوال بھی کیا کہ گزشتہ سال کے بجٹ میں کیے گئے دعوے اور وعدے کس حد تک پورے ہوئے اور کیا عوام کے معیارِ زندگی میں حقیقی بہتری نظر آئی؟

مرکزی بجٹ ۲۷۔۲۰۲۶ء  پر ردِعمل ظاہر کرتے ہوئے کمیونسٹ پارٹی آف انڈیا (سی پی آئی) کے راجیہ سبھا رکن پی  سندوش کمار نے کہا کہ یہ بجٹ عام لوگوں کے روزگار کو نظرانداز کرتا ہے اور وفاقی ڈھانچے کو کمزور بناتا ہے۔ انہوں نے الزام عائد کیا کہ وزیرِ خزانہ نرملا سیتارمن کی جانب سے پیش کیا گیا بجٹ عوام کی بڑھتی ہوئی معاشی مشکلات سے منہ موڑنے اور اقتدار و وسائل کو چند محدود ہاتھوں میں مرکوز کرنے کا اشارہ دیتا ہے۔ کمار نے کہا کہ حقیقی آمدنی میں کمی، بڑھتی بے روزگاری اور مہنگائی کے دور میں بجٹ میں نہ تو طلب بڑھانے کے کوئی ٹھوس اقدامات ہیں اور نہ ہی ملازم پیشہ اور متوسط طبقے کو کوئی راحت دی گئی ہے۔ زرعی شعبے کی نظراندازی پر تشویش ظاہر کرتے ہوئے انہوں نے کہا کہ کسانوں کی قانونی کم از کم امدادی قیمت کی مانگ کو مکمل طور پر نظرانداز کر دیا گیا ہے۔ انہوں نے تعلیم، صحت اور روزگار کی تخلیق کیلئے  ناکافی بجٹ الاٹمنٹ پر تنقید کی اور کہا کہ مینوفیکچرنگ شعبے کو بحال کرنے کے بجائے نجکاری کو فروغ دیا جا رہا ہے۔ کیرالا سمیت ریاستوں کے ساتھ امتیازی سلوک کا الزام لگاتے ہوئے انہوں نے بجٹ کو عوام مخالف قرار دیا۔