پاکستان میں زلزلے کے جھٹکے سے دیوار میں دراڑ پڑنے کے سبب جیل سے ۲۰۰؍ قیدی فرار ہو گئے، رات کو فرار ہونے والے قیدیوں کی تلاش کے دوران تقریباً۸۰؍ قیدیوں کو دوبارہ حراست میں لے لیا گیا۔

صوبائی وزیر اعلیٰ نے منگل کو بتایا کہ جنوبی بندرگاہی شہر کراچی میں ایک جیل سے  ۲۰۰؍سے زائد قیدی زمین کے جھٹکوں سے جیل کی دیواروں کے ٹوٹنے کے بعد فرار ہو گئے۔ سندھ کے وزیر اعلیٰ مراد علی شاہ نے بتایا کہ یہ واقعہ پیر کی رات دیر گئے اس وقت پیش آیا جب ملیر جیل میں ایک ٹوٹی ہوئی دیوار سے قیدی فرار ہو گئے، جسے اتوار سے اس علاقے میں متعدد کم شدت کے جھٹکوں نے متاثر کیا تھا۔ شاہ نے کراچی میں صحافیوں سے بات کرتے ہوئے کہا کہ ’’جھٹکوں کے بعد قیدیوں کو بیرکوں سے باہر نکال لیا گیا، جو کہ غلط تھا‘‘، انہوں نے مزید کہا کہ قیدیوں نے جیل کے سیکورٹی اہلکاروں سے رائفلیں بھی چھین لیں، اور فائرنگ کے دوران ایک قیدی ہلاک ہو گیا۔ انہوں نے بتایا کہ کچھ پولیس اہلکار بھی زخمی ہوئے۔  انہوں نے مزید کہا کہ تقریباً۲۱۶؍ قیدی فرار ہو گئے، جبکہ اب تک۸۰؍ سے ۸۲؍ قیدیوں کو دوبارہ حراست میں لے لیا گیا ہے۔  انہوں نے اس واقعہ کو ’’تشویشناک‘‘ قرار دیتے ہوئے کہا کہ ’’ ملیر جیل میں ۶۰۰۰؍ سے زائد قیدی ہیں، اور جیل انتظامیہ نے انہیں بیرکوں سے باہر نکال لیا، اور ان میں سے کچھ فرار ہو گئے۔‘‘تاہم انہوں نے خبردار کیا کہ فرار ہونے والے تمام قیدیوں کو فوری طور پر ہتھیار ڈال دینے چاہئیں، ورنہ وہ دہشت گردی کے خلاف قانون کے تحت مقدمات کا سامنا کریں گے۔