یشوردھن چوہان کے ۱۲۲؍ اور وی کےونیت کے ۸۷؍ رنوں کی مدد سے ہندوستان نے پیر کو یہاں آسٹریلیا کیخلاف دوسرے یوتھ ون ڈے میچ میں۱۰۲؍ رنوں کی بڑی جیت حاصل کی اور ۳؍ میچوں کی انڈر-۱۹؍ سیریز میں دوصفرکی ناقابلِ شکست برتری حاصل کر لی۔ چوہان کی سنچری،ونیت کی نصف سنچری اور آریہ ویر سہواگ (۴۷) اور کشاگر اوجھا (۳۴) کی اہم  اننگزکی بدولت، ہندوستان کی انڈر۔ ۱۹؍ٹیم نے پہلے بلے بازی کرتے ہوئے ۷؍ وکٹوں پر ۳۴۱؍رنوں کا بڑا اسکور کھڑا کیا۔ اس کے جواب میں آسٹریلیا کی ٹیم ۱ء۴۱؍اوور میں ۲۳۸؍ رنوں پر آؤٹ ہو گئی۔یاد رہے کہ  ہندوستان نے اس سے قبل بارش سے متاثرہ پہلا میچ  ۷؍ رن سے جیتا تھا۔ تیسرا اور آخری یوتھ ون ڈے میچ بدھ کو یہیں کھیلا جائے گا، جس کے بعد دونوں ٹیمیں ۲؍میچوں کی ۴؍روزہ یوتھ ٹیسٹ سیریز میں آمنے سامنے ہوں گی۔

 

 

آسٹریلیا کے سامنے بڑا ہدف تھا اور ہندوستان نے اس پر دباؤ بنانے کیلئے ۷؍ الگ الگ بولنگ آپشنز کا استعمال کیا۔ چگوروپتی وینکٹ  ہندوستانی گیندبازوں میں سب سے کامیاب رہے۔ انہوں نے ۶۴؍ رن دے کر ۳؍ وکٹیں حاصل کیںجبکہ کاویا پٹیل اور چوہان نے ۲۔۲؍ وکٹیں لیں۔ موہت اولوا، منل چوہان اور یشویر گوڑ نے بھی ایک ایک وکٹ حاصل کیا۔