فلپائن نے ہندوستانی سیاحوں کیلئے ویزا فری پالیسی کا اعلان کیا ، یہ اقدام ہندوستان سے آنے والے سیاحوں کی تعداد بڑھانے کیلئے اٹھایا گیا ہے۔

فلپائنی حکومت نے اعلان کیا ہے کہ ۸؍ جون ۲۰۲۵ء سے ہندوستانی شہری سیاحت کی غرض سے فلپائن ویزا کے بغیر داخل ہو سکیں گے۔ یہ اقدام ہندوستان سے آنے والے سیاحوں کی تعداد بڑھانےکیلئے  اٹھایا گیا ہے۔۲۰۲۴ء میں فلپائن آنے والے ہندوستانی سیاحوں میں۱۲؍ فیصد اضافہ ہوا تھا، جن کی کل تعداد تقریباً ۸۰؍ ہزار تک پہنچ گئی۔ تاہم، گزشتہ سال جنوب مشرقی ایشیا کے پانچ ملین سے زیادہ سیاحوں میں ہندوستانیوں کا حصہ اب بھی کافی کم ہے۔
 ویزا فری پالیسی کی تفصیلات:
عام ہندوستانی شہری فلپائن میں۱۴؍ دن تک بغیر ویزا کے قیام کر سکیں گے۔
  جو ہندوستانی شہری امریکہ، آسٹریلیا، کینیڈا، شینگن ممالک، سنگاپور یا برطانیہ کا درست ویزا یا رہائشی اجازت نامہ رکھتے ہیں، وہ۳۰؍ دن تک ویزا فری قیام کے اہل ہوں گے۔  

یہ بھی پڑھئے: لاس اینجلس: امیگریشن چھاپوں کیخلاف پُرتشدد مظاہرے، نیشنل گارڈز تعینات کا اعلان

یہ اقدامات فلپائن کی اس وسیع تر کوشش کا حصہ ہیں جس کا مقصد بین الاقوامی، خاص طور پر ہندوستان سے زیادہ سیاحوں کو اپنی طرف راغب کرنا ہے۔
 نئی فلائٹس کا اعلان:  
اس خبر سے کچھ دن قبل، ایئر انڈیا نے بھی اعلان کیا تھا کہ وہ یکم اکتوبر ۲۰۲۵ءسے دہلی اور منیلا کے درمیان نان اسٹاپ پروازیں شروع کرے گی۔
ایئر لائن ،ایئربس اے ۳۲۱؍ نیو طیاروں کے ذریعے ہفتے میں پانچ پروازیں چلائے گی۔
 طیاروں میں بزنس کلاس، پریمیم اکانومی کلاس اور اکانومی کلاس کی سہولیات دستیاب ہوں گی۔
یہ نیا راستہ ایئر انڈیا کو ہندوستان اور فلپائن کے درمیان براہ راست کنکٹیویٹی فراہم کرنے والی واحد طیارہ بردار کمپنی بنا دے گا، جس سے دونوں ممالک کے درمیان سفر آسان ہو گا اور تعلقات مزید مضبوط ہوں گے۔  
واضح رہے کہ فلپائن کی یہ ویزا فری پالیسی اور ایئر انڈیا کی نئی فلائٹس دونوں ممالک کے درمیان سیاحت اور روابط کو فروغ دینے کی جانب اہم قدم ہیں۔