ایس آئی آر کے خلاف اور چیف الیکشن کمشنر (سی ای سی) گیانیش کمار کے استعفیٰ کے مطالبے کو لے کر اپوزیشن کی جانب سے احتجاجی مظاہروں کا سلسلہ جاری ہے۔ اس ضمن میں انڈیا بلاک کے لیڈران ایک نئی حکمت عملی پر غور کر رہے ہیں، جس کے تحت ماک (علامتی) پارلیمنٹ منعقد کرکے وہاں باقاعدہ مواخذے کی کارروائی کی جائے اور گیانیش کمار کو ہٹایا جائے۔ فی الحال یہ تجویز ہے لیکن اس پر بہت سرگرمی کے ساتھ غور کیا جارہا ہے۔ اگلے ماہ رام لیلا میدان میں انڈیا اتحاد کی بڑی ریلی کا منصوبہ ہے اور اسی ریلی میں یہ ماک پارلیمنٹ منعقد کی جاسکتی ہے۔فی الحال اس تجویز پر سبھی اپوزیشن پارٹیوں نے اتفاق نہیں کیا ہے لیکن کانگریس رکن پارلیمنٹ اور اپوزیشن لیڈر راہل گاندھی نے اسے ہری جھنڈی دے دی ہے۔ 

دراصل انڈیا بلاک کے کچھ لیڈران  نے حکومت کو عار دلانے کیلئے چیف الیکشن کمشنر گیانیش کمار کے خلاف مواخذے کی کارروائی پر بحث کیلئے رام لیلا میدان میں ’ماک پارلیمنٹ‘ (علامتی پارلیمنٹ) منعقد کرنے کی تجویز پیش کی  ہے۔میڈیا رپورٹس میں بتایا جا رہا ہے کہ راہل گاندھی نے اس تجویز سے اصولی طور پر اتفاق کر لیا ہے۔ اب اس کے خد وخال پر گفتگو کی جائے گی اور اگلے ماہ کی شروعات میں انڈیا اتحاد کی مہا ریلی میں یہ پارلیمنٹ منعقد کی جاسکتی ہے۔