تمل ناڈو کے وزیر اعلیٰ ایم کے اسٹالن نے بھی ’ایس آئی آر‘ کے خلاف ۲؍نومبر کو آل پارٹی میٹنگ طلب کی.
وائناڈ میں پرینکا گاندھی لوگوں سے ملتے ہوئے دیکھی جاسکتی ہیں۔ تصویر:پی ٹی آئی
کانگریس پارٹی کی طرف سے ایس آئی آر کے خلاف مسلسل آواز بلند کی جارہی ہے۔پارٹی کےاعلیٰ لیڈران اس مسئلے پر الیکشن کمیشن کے طریقۂ کار پر سوال اٹھا رہے ہیں۔ بدھ کو رکن پارلیمنٹ پرینکا گاندھی نے اعلان کیا کہ وہ کیرالہ میں ’ایس آئی آر‘ (ووٹر لسٹ کی خصوصی گہری نظرثانی) کی مخالفت کریں گی۔ انہوں نے کہا کہ جس طرح بہار میں ایس آئی آر کے نام پر دھاندلی ہوئی، ویسا ہی کھیل اب دوسری ریاستوں میں بھی کھیلا جا رہا ہے اور کانگریس اسے کسی بھی حالت میں برداشت نہیں کرے گی۔یہ بیان پرینکا گاندھی نے آج وائناڈ پہنچنے کے بعد دیا۔ انھوں نے کہا کہ الیکشن کمیشن کئی ریاستوں میں ووٹر لسٹ کی خصوصی نظرثانی کرنے کی تیاری میں ہے، جس میں کیرالہ بھی شامل ہے۔
پرینکا کا کہنا ہے کہ ’’ہم نے بہار میں بھی اس کی مخالفت کی تھی، پارلیمنٹ کے اندر اور باہر دونوں جگہ اور آگے بھی ہر جگہ اس کی مخالفت جاری رہے گی۔‘‘ پرینکا نے ایس آئی آر کو دھوکہ دھڑی اور انتخابی جعل سازی کا ایک طریقہ بتایا اور کہا کہ یہ جمہوریت کے خلاف سازش ہے۔بہار کا حوالہ دیتے ہوئے پرینکا گاندھی نے کہا کہ بہار میں جس طرح سے ووٹر لسٹ کی خصوصی گہری نظرثانی کی گئی، اس سے صاف ہے کہ اس کا مقصد لوگوں کے ووٹنگ حقوق کو محدود کرنا ہے۔ انھوں نے متنبہ کیا کہ اگر یہی طریقہ ملک بھر میں اختیار کیا گیا تو یہ جمہوریت پر حملہ ہوگا۔ وہ کہتی ہیں کہ ’’ہم نے دیکھا ہے کہ بہار میں کیا ہوا اور اگر وہی باقی ریاستوں میں دوہرایا گیا تو یہ جمہوریت کی بے حرمتی ہوگی۔‘‘ واضح رہے کہ پرینکا گاندھی وائناڈ کے ۲؍روزہ دورے پر ہیں، جہاں وہ اپنے پارلیمانی حلقہ میں کئی ترقیاتی منصوبوں کا افتتاح کریں گی۔ وہ بدھ کی صبح کاریپور ایئرپورٹ پہنچیں اور سڑک کے راستہ سے وائناڈ تک سفر کیا۔ اس دوران انھوں نے ملپورم ضلع کے ایرناڈ میں راجیو گاندھی میموریل گورنمنٹ آیوروید ڈسپنسری کی نئی عمارت کا افتتاح بھی کیا۔ پارٹی ذرائع کے مطابق وہ اپنے دورے میں مقامی لوگوں سے ملاقات کر ترقیاتی کاموں کا جائزہ بھی لیں گی۔
ادھرتمل ناڈو کے وزیر اعلیٰ ایم کے اسٹالن نے بھی ’ایس آئی آر‘ معاملے پر پرینکا گاندھی کے رخ کی حمایت کی ہے۔ انھوں نے کہا کہ ۲؍نومبر کو ہونے والی آل پارٹی میٹنگ جمہوریت کی حفاظت کے لیے طلب کی گئی ہے۔ اسٹالن نے الزام عائد کیا کہ بی جے پی ’ایس آئی آر‘ کے ذریعہ تمل ناڈو کی عوام کے ووٹنگ حقوق چھیننے کی کوشش کر رہی ہے۔ انھوں نے یہ بھی کہا کہ ووٹ دینا جمہوریت کی بنیاد ہے، ہم کسی بھی قیمت پر اسے قربان نہیں کریں گے۔ اسٹالن نے سبھی سیاسی پارٹیوں سے اپیل کی کہ وہ نااتفاقی کو فراموش کر کےاس میٹنگ میں شامل ہوں اور جمہوریت کی حفاظت کے لیے متحد ہوں۔
خیال رہے کہ کیرالا کے وزیراعلیٰ پنرائی وجین نے بھی ایس آئی آر کو غیرجمہوری اقدام قرار دیا ہے اور الیکشن کمیشن کو ہدف تنقید بنایا ہے۔
