کنیڈا کے ابیسٹ فورڈ شہر میں ہند نژاد مشہور کاروباری درشن سنگھ کو ان کے گھر کے باہر گولی مار کر قتل کر دیا گیا۔ یہ واردات اس وقت انجام دی گئی جب درشن سنگھ اپنے گھر سے باہر نکل رہے تھے۔ درشن سنگھ ٹیکسٹائل ری سائیکلنگ کے کاروبار سے منسلک تھے اور ان کی فیکٹری میں سیکڑوں ملازمین کام کرتے تھے۔ واردات کی اطلاع ملتے ہی کنیڈا پولیس موقع پر پہنچی اور فوری طور پر واقعہ کی تحقیقات شروع کر دی۔ اس معاملے کی تاوان کے پہلو سے بھی جانچ کی جا رہی ہے۔ ابتدائی معلومات کے مطابق درشن سنگھ کو کچھ عرصے سے تاوان کی دھمکیاں مل رہی تھیں لیکن انہوں نے دھمکیوں  پر سنجیدگی کا مظاہرہ نہیں کیا۔

درشن سنگھ بنیادی طور سے پنجاب کے ضلع لدھیانہ کے قریب دوراہا علاقے کے رہنے والے تھے اور وہ کئی سال پہلے کنیڈا منتقل ہوئے تھے۔ کہا جا رہا ہے کہ انہوں نے اپنی محنت اور کاروبار کی بنیاد پر وہاں کافی شہرت حاصل کی تھی۔ ہندوستانی برادری میں وہ کافی معزز شخصیت مانے جاتے تھے اور سماجی خدمت اور فلاحی کاموں میں سرگرم کردار ادا کرتے تھے، حالانکہ خبرلکھے جانے تک کنیڈا کی پولیس نے  اس قتل میں کسی گینگسٹر یا تاوان گروہ کے ملوث ہونے سے انکار کیا ہے۔ پولیس کا کہنا ہے کہ اہل خانہ نے اس  سلسلے میں کسی شک کا اظہار نہیں کیا ہے۔اس دوران لارنس بشنوئی گینگ سے وابستہ مجرم گولڈی ڈھلون نے سوشل میڈیا پر اپنی ایک پوسٹ میں مشہور کاروباری درشن سنگھ ساہسی کے قتل کی ذمہ داری قبول کی ہے۔ پوسٹ میں گینگ نے دعویٰ کیا کہ انہوں نے درشن سنگھ سے ان کے بڑے کاروبار کے بدلے رقم کی مانگ کی تھی لیکن جب درشن سنگھ نے پیسے دینے سے انکار کر کے ان کا نمبر بلاک کر دیا تو گینگ نے یہ قدم اٹھایا۔بہرحال اس سنسنی خیز قتل کی واردات سے کنیڈا کے پولیس محکمہ میں کھلبلی مچ گئی ہے۔  مقامی ہندوستانی برداری بھی خوفزدہ ہوگئی ہے، حالانکہ کنیڈا پولیس نے معاملے کو جلد حل کرنے اور قصورواروں کو گرفتار کرنے کی بات کہی ہے۔