ناروے میں قرآن کریم کا نسخہ نذرِ آتش کرنے کے خلاف صدائے احتجاج بلندکرنے کے بعد بدھ کورضااکیڈمی کی جانب سے ایک وفد نے ناروے کی سفیرمس این اولیسٹیڈ اور نائب کونسل جنرل سے ان کے دفتر میں صبح ۱۱؍بجے ملاقات کی

ممبئی :  ناروے میں قرآن کریم کا نسخہ نذرِ آتش کئے جانے کے خلاف صدائے احتجاج بلندکرنے کے بعد بدھ کو رضا اکیڈمی کی جانب سے ایک وفد نے ناروے کی سفیر مس این اولیسٹیڈ اور نائب کونسل جنرل سے ان کے دفتر میں صبح ۱۱؍بجے ملاقات کی۔ ناروے میں کلام ِ الٰہی کے نسخے کو جلانے کی مذموم جرأت ’ایس آئی اواین ‘نام کی تنظیم سے وابستہ ایک شخص کے ذریعے کی گئی تھی ۔ دورانِ ملاقات ناروے کی سفیر کوایک میمورنڈم دیا گیا جس میں مذکورہ تنظیم پر پابندی عائد کرنے ، گستاخی کرنے والے شخص کو سخت ترین سزا دینے اورآئندہ ایسی سنگین واردات پرقدغن لگانے کا مطالبہ کیا گیا ہے۔
ملاقات کے دو ران ناروے کی سفیرمس این اولیسٹیڈ نے کہا کہ’’ آپ کا یہ خط ہم اپنے ملک کے سربراہ کوبھیج دیں گے۔ ہمارے ملک میں ہرایک کوآزادیٔ اظہار رائے کا حق حاصل ہے مگر اس کا یہ مطلب بھی نہیں کہ کسی کی توہین کی جائے ۔ ‘‘
وفد میں محمد سعید نوری (جنرل سیکریٹری رضا اکیڈمی )، مولانا خلیل الرحمٰن نوری ، مولانا عباس رضوی، مولانا خلیل اللہ سبحانی اور فیروز عثمان شامل تھے۔