امریکی پابندیوں (ٹرمپ ٹیرف اثر) اور جہاز کے مڑنے کے باوجود، ہندوستان اکتوبر میں روسی خام تیل کا دوسرا سب سے بڑا خریدار رہا۔ہندوستان نے ماسکو سے تقریباً ۵ء۲؍ بلین یورو مالیت کا خام تیل خریدا۔ پابندیوں سے نجی ریفائنرز متاثر ہوئے جبکہ سرکاری ریفائنریز نے خریداری میں اضافہ کیا۔

امریکہ کی طرف سے روس کی دو سب سے بڑی تیل کمپنیوں روزنیفٹ اور لوکوئیل پر پابندیاں عائد کرنے اور ریلائنس انڈسٹریز جیسے بڑے ہندوستانی ریفائنرز کے جہازوں کو امریکہ کی طرف موڑنے کے باوجود، ہندوستان اکتوبر میں روس سے خام تیل کا دوسرا سب سے بڑا درآمد کنندہ رہا۔ یوروپی تھنک ٹینک سینٹر فار ریسرچ آن انرجی اینڈ کلین ایئر (سی آر ای اے) کی ایک رپورٹ کے مطابق، ہندوستان نے اکتوبر میں ماسکو سے۹ء۲؍ بلین ڈالر (تقریباً ۵ء۲؍ بلین یورو) خام تیل خریدا، جو کل روسی جیواشم ایندھن کی درآمدات کا۸۱؍فیصد ہے۔ یہ تعداد ستمبر کے مقابلے میں ۱۱؍ فیصد زیادہ ہے۔
یہ اعداد و شمار حیران کن ہے کیونکہ حالیہ دنوں میں یہ رپورٹس آئی تھیں کہ ریفائنرز جیسے ریلائنس انڈسٹریز، ایچ پی سی ایل-مٹل انرجی لمیٹڈ اور منگلور ریفائنری اینڈ پیٹرو کیمیکلز لمیٹڈ نے درآمدات کو عارضی طور پر روک دیا ہے۔ پی ٹی آئی کی رپورٹ کے مطابق ان کمپنیوں نے اپنے جہازوں کا رخ امریکی بندرگاہوں کی طرف موڑ دیا۔ مزید برآں، امریکی صدر ڈونالڈ ٹرمپ نے دعویٰ کیا کہ ہندوستان نے امریکی محصولات کے دباؤ کی وجہ سے روسی تیل کی خریداری میں کمی کی ہے۔
کیا روس سے تیل کی درآمد اچانک بند نہیں ہو سکتی؟
تیل کی خریداری آج آرڈر کرنے اور کل وصول کرنے کا معاملہ نہیں ہے۔ انہیں چار سے چھ ہفتے پہلے حتمی شکل دی جاتی ہے۔ اس کا مطلب یہ ہے کہ اس وقت جو تیل پہنچ رہا ہے وہ ستمبر میں ہی تھا۔ اس لیے اگر آج کوئی فیصلہ ہو بھی جاتا ہے تو اس کے اثرات نومبر یا دسمبر کے بعد ہی نظر آئیں گے۔ تازہ ترین برآمدی ڈیٹا اکتوبر کا ہے۔
روس سے درآمدات کب تک کم ہوں گی؟
موجودہ ڈیٹا پچھلی ڈیل پر مبنی ہے۔ جن کمپنیوں کے جہازوں کا رخ امریکہ کی طرف موڑ دیا گیا ہے ان کے اعداد و شمار دسمبر تک واضح ہو سکتے ہیں۔ اس کا مطلب ہے کہ جب دسمبر کے خام تیل کی برآمدات کے اعداد و شمار جاری ہوں گے تو ممکن ہے کہ روس سے برآمدات میں کمی آئے گی۔بحری جہازوں کو امریکہ کی طرف موڑنے کے فیصلے کے اثرات دسمبر تک نظر آئیں گے۔

یہ بھی پڑھئے:ناگالینڈ میں کارپوریٹ سرمایہ کاری اور مہارت کی ترقی مضبوط ہو رہی ہے: سیتا رمن

دسمبر کے لیے، پانچ بڑے ریفائنرز
ریلائنس، بھارت پیٹرولیم، ہندوستان پیٹرولیم، منگلور ریفائنری، اور ایچ پی سی  ایل متل نے روسی تیل کے لیے آرڈر نہیں  دیئے۔ ان کمپنیوں کا اس سال کی روسی درآمدات کا دو تہائی حصہ تھا۔ صرف انڈین آئل کارپوریشن  اور نیارا انرجی نے کچھ خریدا۔  تاہم  غیر محدود فروخت کنندگان سے حاصل کیا گیا۔ ٹرمپ نے اگست میں ہندوستانی درآمدات پر محصولات کو دوگنا کرکے ۵۰؍ فیصد کرنے اور تجارتی مذاکرات پر دباؤ ڈالنے کے بعد ہندوستان امریکی تیل کی خریداری میں اضافہ کرنے کا وعدہ کر رہا ہے۔