ناگپور میں جاری او بی سی سماج کے احتجاج کے دوران او بی سی مہاسنگھ کے قومی صدر ببن راؤ تائیواڑے کا موقف۔

’’ہندوستانی آئین کے مطابق ریزرویشن ذات کو دیا جاتا ہے، برادری کو نہیں، اسلئے بھاؤ صاحب پنجاب راؤ دیشمکھ نے ملک کی آزادی کے وقت مراٹھا برادری کے لوگوں سے کنبی ذات کا سرٹیفکیٹ حاصل کرنے کی اپیل کی تھی۔ تاہم، ودربھ کے علاوہ کسی دوسرے علاقے کے مراٹھا سماج نے اس وقت کنبی ذات کے سرٹیفکیٹ حاصل نہیں کیے تھے۔‘‘  آل انڈیا او بی سی مہاسنگھ کے صدر ببن راؤ تائیواڑے نے مذکورہ بیان دیا ہے۔
  ریاستی  وزیر چندرکانت پاٹل نے کہا ہے کہ جرنگے پاٹل کی تحریک سیاسی ریزرویشن کیلئے  ہے۔ اُسی طرح ناگپور کے مراٹھا بھوسلے خاندان سے تعلق رکھنے والے مُدھوجی راجے بھوسلے نے بھی مراٹھا سماج کو الگ زمرہ سے ریزرویشن دینے کی بات کہی ہے۔ ان دونوں بیانات پر ببن راؤ تائیواڑے نے کہا کہ او بی سی مہا سنگھ ان کے موقف کا خیر مقدم کرتی ہے۔  تائیواڑے نے مزید وضاحت کے ساتھ میڈیا کو بتایا کہ پنجاب راؤ دیشمکھ کو مہاراشٹر میں زرعی اور تعلیمی انقلاب کا بانی کہا جاتا ہے۔ دلتوں کیلئے  مندر کھولنے کی تحریک کے بعد سے ان کی اور بابا صاحب امبیڈکر کی اچھی دوستی تھی۔ انہوں نے باباصاحب کو مشورہ دیا تھا کہ کنبی برادری کواصل  دھارے میں لانے کیلئے آئین میں کچھ دفعات لائی جانی چاہیے، پھر ۶۰ء کی دہائی میں پنجاب راؤ دیشمکھ نے یہ تجویز پیش کی کہ مراٹھا کسان مراٹھا نہیں ہیں بلکہ مراٹھا `کنبی  ہیں اور اسے آئینی طور پر منظور کر لیا گیا۔ اس وقت ودربھ میں کسانوں کی ایک بڑی تعداد نے کنبی ہونے کا سرٹیفکیٹ حاصل کیا تھا۔ اور اس کی وجہ سے ودربھ میں کنبی برادری کی اکثریت کو ریزرویشن ملا۔ اس میں ڈاکٹر پنجاب راؤ دیشمکھ کا بڑا ہاتھ تھا۔ ودربھ میں کنبی برادری اب تک پنجاب راؤ دیشمکھ کے اس ویژن سے فائدہ اٹھا رہی ہے۔ ۱۹۹۰ء میں منڈل کمیشن کی سفارشات کے بعد ودربھ کی کنبی برادری کو اس ریزرویشن کا صحیح معنوں میں فائدہ ہوا۔ کیونکہ ودربھ کی مراٹھا برادری نے پہلے ہی اپنے ذات کے سرٹیفکیٹ میں صرف کنبی کو درج کیا تھا، مراٹھا کو چھوڑ کر، ودربھ کی کنبی برادری کو کل ۱۹ ؍فیصد او بی سی زمرے میں یہ مقام ملا۔ اس سب کے پیچھے ڈاکٹر پنجاب راؤ دیشمکھ کی دور اندیشی بنیادی وجہ تھی، انہوں نے جو اہم قدم اٹھایا ہے وہ ودربھ کے کنبی برادری کی کئی نسلوں کے لیے فائدہ مند رہا ہے اور جاری ہے۔