وزیر اعظم  نریندر مودی نےبدھ کو ویڈیو کانفرنسنگ کے ذریعے جی ایم آر ایئرو اسپیس اینڈ انڈسٹریل پارک-ایس ای زیڈ ، راجیو گاندھی بین الاقوامی ہوائی اڈے ، حیدرآباد میں ’سفران ایئرکرافٹ انجن سروسیز انڈیا‘ (ایس اے ای ایس آئی) کی سہولت کا افتتاح کیا۔ اس موقع پر خطاب کرتے ہوئے  وزیر اعظم نے کہا کہ’’آج سے ہندوستان کا ہوا بازی کا شعبہ ایک نئی پرواز بھر رہا ہے۔ سفران کی نئی سہولت ہندوستان کو عالمی دیکھ بھال ، مرمت اور اوور ہال (ایم آر او) کے مرکز کے طور پر قائم کرنے میں مدد کرے گی ۔ ‘‘

واضح رہے کہ فرانسیسی کمپنی ’سفران‘ کا طیاروں  کے انجنوں کی دیکھ بھال، مرمت اور اووَ ہال(ایم آر او) کا یہ مرکز ہندوستان میں  اپنی نوعیت کا پہلا مرکز ہے۔ وزیر اعظم نے  امید ظاہر کی کہ یہ ایم آر او سہولت ہائی ٹیک ایئرو اسپیس سیکٹر میں نوجوانوں کیلئے نئے مواقع بھی پیدا کرے گی ۔  انہوں نے امید ظاہر کی کہ ہندوستان میں سفران  کی سرمایہ کاری اسی رفتار سے جاری رہے گی ۔  اپنی نیک خواہشات کا اظہار کرتے ہوئے وزیر اعظم نے اس نئی سہولت کے لیے ٹیم سفران کو مبارکباد پیش کی  اورانہیں ’ہندوستان میں  بنے انجنوں ‘ کے فروغ کا مشورہ بھی دیا۔ 

اس بات پر روشنی ڈالتے ہوئے کہ حالیہ برسوں میں ہندوستان کے ہوا بازی کے شعبے نے بے مثال رفتار سے ترقی کی ہے،  مودی نے کہا کہ آج ہندوستان دنیا میں سب سے تیزی سے بڑھتی ہوئی گھریلو ہوا بازی کے بازاروں میں سے ایک ہے۔  انہوں نے اس بات پر زور دیا کہ ہندوستان کی گھریلو ہوابازی کا بازار اب عالمی سطح پر تیسرا سب سے بڑا مارکیٹ بن گیا ہے ۔  وزیر اعظم نے کہا کہ ہندوستان کے عوام کی امنگیں نئی بلندیوں پر پہنچ رہی ہیں اور اس کے نتیجے میں ملک میں ہوائی سفر کی مانگ میں مسلسل اضافہ ہو رہا ہے ۔  انہوں نے کہا کہ ایئر لائنز اس مانگ کو پورا کرنے کیلئے  اپنے فعال بیڑے کو مسلسل توسیع دے رہی ہیں۔ انہوں نے مزید کہا کہ ہندوستانی ایئر لائنس نے ۱۵۰۰؍سے زیادہ نئے طیاروں کا آرڈر دیا ہے۔

وزیرِ اعظم نے اس بات پر زور دیا کہ ہندوستان کے ہوابازی کے شعبے کی تیز رفتار توسیع کے ساتھ ساتھ ایم آر او سہولیات کی ضرورت بھی بڑھ گئی ہے۔ انہوں نے کہا کہ ہندوستان کا تقریباً۸۵؍فیصد ایم آر او کام بیرونِ ملک ہو رہا تھا، جس کی وجہ سے اخراجات زیادہ، کارروائی کے اوقات طویل اور طیارے طویل مدت تک زمین پر رہتے تھے۔ انہوں نے کہا کہ آج حکومت ہند ملک کو دنیا کے بڑے ایم آر او مراکز میں سے ایک کے طور پر ترقی دے رہی ہے۔

انہوں نے مزید کہا کہ ہندوستان صرف ہوا بازی کے ایم آر او تک محدود نہیں رہنا چاہتا بلکہ جہاز رانی سے منسلک ایم آر او ماحولیاتی نظام تیار کرنے کیلئےبھی بڑے پیمانے پر کام کر رہا ہے ۔ نریندر مودی نے اس بات پر زور دیا کہ ہندوستان ہر شعبے میں بڑے پیمانے پر’’ ڈیزائن ان انڈیا‘‘ کو فروغ دے رہا ہے ۔  انہوں نے سفران ٹیم پر زور دیا کہ وہ ہندوستان میں ہوائی جہاز کے انجن اور اجزاء کے تیار کرنےکے امکانات تلاش کرے۔  انہوں نے کہا کہ ہندوستان کا وسیع ایم ایس ایم ای نیٹ ورک اور اس کا نوجوان ٹیلنٹ پُول اس کوشش میں اہم تعاون فراہم کرے گا۔