ٹرکوں اور ٹینکروں کی ہڑتال ختم ہونے کے باوجود شہر میں پیٹرول اور ڈیزل کی قلت ، مجبوراً سروس بند رکھی گئی۔

ٹرک و ٹینکر ڈرائیوروں کی ہڑتال کے بعد ناگپور میں اسکول بس اور وین ڈرائیوروں نے ایک دن کی ہڑتال کی ہے جس کی وجہ سے والدین کو صبح سے ہی اپنے بچوں کو اسکول چھوڑنے اور لانے کیلئے سخت مشقت کرنی پڑی۔ اس ہڑتال میں ناگپور شہر اور دیہی علاقوں کے ۳؍ ہزار سے زیادہ اسکول بسوں اور ۷۰۰؍ سے زیادہ اسکول وین ڈرائیوروں نے حصہ لیا۔
شہر میں جہاں پہلے ہی پیٹرول کی قلت کے باعث شہری مشکلات کا شکار ہیں ، وہیں ہڑتال نے طلبہ اور والدین کی پریشانیوں میں اضافہ کر دیا ہے۔ ناگپور شہر کے تقریباً ۷۵؍فیصد پٹرول پمپ ۲؍جنوری کی دوپہر تک بند ہو چکے تھے۔ دوسری جانب مرکزی حکومت نے کارگو ٹرانسپورٹرس ایسوسی ایشن کو گفتگو کیلئے بلایا جبکہ ہڑتال میں شدت آتی جا رہی تھی۔ میٹنگ میں بہر حال ہڑتال کے حوالے سے حل نکل آیا۔ ناگپور میں اسکول بس اور اسکول وین ڈرائیوروں نے ہٹ اینڈ رن قانون کے خلاف کی گئی ہڑتال کی حمایت کی تھی لیکن جمعرات کو شہر میں خاطر خواہ پیٹرول نہ ہونے کے سبب انہوں نے بسیں بند رکھیں ۔ مہاراشٹر اسکول بس ایسوسی ایشن کے صدر انیل گرگ نے کہا ہے کہ جب تک اسکول بسوں کو ڈیزل ملتا رہیگا، وہ سڑکوں پر چلیں گی اور ہم خدمات فراہم کریں گے۔ ہم نے ایندھن نہ ملنے کی وجہ سے جمعرات کو گاڑیاں نہ چلانے کا فیصلہ کیا ہے۔