بی جے پی کےسینئر اور معمر لیڈر لال کرشن اڈوانی کو ملک کے اعلیٰ ترین شہری اعزاز بھارت رتن سے نوازا جائے گا۔

بی جے پی کےسینئر اور معمر لیڈر لال کرشن اڈوانی کو ملک کے اعلیٰ ترین شہری اعزاز بھارت رتن سے نوازا جائے گا۔ وزیر اعظم نریندر مودی نے یہاں ایکس پر یہ اطلاع فراہم کی   مودی نے لکھا کہ ’’مجھے یہ بتاتے ہوئے بہت خوشی محسوس ہو رہی ہے کہ ہم سب کے ہر دل عزیز لیڈر اور ملک کے سابق نائب وزیر اعظم لال کرشن اڈوانی جی کو بھارت رتن سے نوازا جائے گا۔ میں نے ان سے بھی بات کی اور انہیں اس اعزاز سے نوازے جانے پر مبارکباد دی۔‘‘ وزیر اعظم مودی نے مزید لکھا کہ اڈوانی جی  ہمارے دور کے سب سے معزز سیاستدانوں میں سے ایک ہیں۔ ہندوستان کی ترقی میں ان کا تعاون ناقابل فراموش ہے۔ ان کی زندگی  زمینی سطح پر کام کرنے سے شروع ہوکر ہمارے نائب وزیر اعظم کے طور پر ملک کی خدمت کرنے تک ہے۔ انہوں نےوزیر داخلہ اور وزیر اطلاعات و نشریات کے طور پر بھی اپنی شناخت بنائی۔ ان کی پارلیمانی  خدمات  ہمیشہ مثالی رہی ہیں۔اس فیصلے پر خوشی کا اظہار کرتے ہوئےبی جے پی کے سابق صدر اور مرکزی وزیر نتن گڈکری نے کہا کہ ’’ملک کے سینئر لیڈر اور ہمارے رہنما لال کرشن اڈوانی کو بھارت رتن کا اعلان بہت خوشگوار اور مسرت بخش ہے۔ اڈوانی جی نے آزادی کے بعد ملک کی تعمیر نو میں اہم کردار ادا کیا ہے۔بھارت رتن کیلئے اپنے نام کا اعلان ہونے پر لال کرشن اڈوانی نے  ملک و قوم کا شکریہ ادا کیا اور کہا کہ ان کی زندگی اپنے لئے نہیں ملک کے  لئے ہے۔ اڈوانی نے ایک بیان جاری کرکےصدر دروپدی مرمو اور وزیر اعظم  مودی کا شکریہ ادا کیا اور کہا کہ  یہ اعزازان نظریات اور اصولوں کے  لئے ہے جن کی میں نے پوری زندگی میں اپنی صلاحیت کے مطابق خدمت کرنے کی کوشش کی ہے۔ یاد رہے کہ لال کرشن اڈوانی رام جنم بھومی تحریک کے بنیاد گزار تھے۔ انہی کی تحریک کی وجہ سے ایودھیا میں بابری مسجد کی شہید ہوئی۔ انہیں بابری مسجد کی شہادت کا اصل ذمہ دار مانا جاتا ہے لیکن کچھ برس قبل عدالت نے انہیں ثبوت نہ ہونے کی بنیاد پربری کردیا تھا ۔  فی الحال اڈوانی پارٹی میں حاشئے پر پہنچا دئیے گئے ہیں۔