مسافروں کی پریشانی کی خبرشائع ہونے کےبعد سینٹرل ریلوے کے رابطہ عامہ کے چیف آفیسرنے حالات کاجائزہ لیا اورتصاویر بھی شیئر کیں۔

ٹرینوں میں بھیڑبھاڑ پر قابوپانے کےانتظامات کا جائزہ لینے کیلئے سینٹرل ریلوے کے رابطۂ عامہ  کے چیف آفیسر ڈاکٹر شیوراج مانس پورے جمعرات کی صبح کرلا میں لوکمانیہ تلک ٹرمنس (ایل ٹی ٹی )  پہنچے۔ بدھ کو نمائندۂ انقلاب نے ان سے تفصیل سے بات چیت کی ، کُشی نگر ایکسپریس کے پریشان حال مسافروں کے ذریعے بنایا گیا ویڈیو اُن کو بھیجا اور ریلوے انتظامیہ کے بہتر انتظامات کے دعوے پرسوال قائم کرنے کے ساتھ مسافروں کی پریشانی کو جمعرات کے اخبار میں نمایاں بھی کیا۔ اس کے بعد انہوں نے حالات کا جائزہ لیا اوراس کی تصاویر بھی شیئر کیں۔وہ دادر اور سی ایس ایم ٹی کا بھی جائزہ لینے گئے۔لیکن پریشان حال مسافروں کا سب سے اہم سوال یہ ہےکہ دیوالی اورچھٹ وغیرہ تہوار ہر سال آتے ہیں اور ریلوے کوپورا ایک سال ملتا ہے پھر بہتر انتظامات اور مسافروں کی کثرت کے پیش نظر ٹرینیں کیوں نہیں چلائی جاتی ہیں۔ بطو رخاص یوپی اوربہار کے مسافروں کےلئے ،یہاں کےمسافر سب سے زیادہ ہیں۔ سب سے بڑا مسئلہ ان ہی دو صوبوں کے مسافروں کےلئے ہوتا ہے کیونکہ ان کے پاس ٹرینوں میںسفر کے علاوہ اورکوئی متبادل نہیںہوتا ہے اورہوائی جہازسے سفر کرنے کی ہر مسافر استطاعت نہیںرکھتا ہے ،اس کےباوجود غفلت کیوں ؟
 سی پی آر او سے یہ پوچھنے پر کہ اگرآپ کے مطابق تمام اسٹیشنوں پربہتر انتظامات ہیں ، آرپی ایف کے جوان قطار میں کھڑے رکھ کر مسافروں کو باری باری بٹھا رہے ہیں اوراسٹیشن عملہ بھی نگرانی کرتا ہے توپھر ایل ٹی ٹی میں۱۲؍ نومبر کویہ حالات کیوں پیدا ہوئے ؟ تو انہوںنے کہا کہ’’ اسے ضرور دیکھا جائے گا لیکن تہواروں کے پیش نظر بڑی تعداد میں ٹرینیں چلائی گئی ہیں اور مسافر اس سے فائدہ بھی اٹھارہے ہیں اور اسٹیشنوں پر انتظامات بھی اطمینان بخش ہیں۔ ‘‘ انہوں نے یہ بھی کہا کہ ’’میں نے ایل ٹی ٹی ۱۱۰۶۱؍ ایل ٹی ٹی دربھنگہ ایکسپریس  کا جائزہ لیا جہاں اسٹاف ترتیب کے مطابق بھیڑکوکنٹرول کررہا تھا۔ یہاں شفٹ کے اعتبار سے ۳۰؍ آرپی ایف جوانوں کو بھیڑبھاڑ کی نگرانی کے لئے تعینات کیا گیا ہے۔ ہیلپ ڈیسک اوراسٹیشن کے سامنے والے حصے میں شامیانہ لگایا گیا ہے۔ آرپی ایف کے جوان میگا فون  کے ذریعے اورپبلک اناؤنسمنٹ سسٹم کے ذریعے مسلسل اعلان کیا جاتا ہے اور مسافروں کی رہنمائی بھی کی جارہی ہے۔‘‘ اس کے علاوہ سی پی آر اونے دادر اورسی ایس ایم ٹی کی تصاویر بھی شیئرکیں اوربتایا کہ اسٹیشنوں پربھی بہترطریقے سے مسافروں کو ٹرینوں میں بٹھایا جارہا ہے تاکہ بدنظمی نہ ہو اور نہ ہی بھگدڑ یا کسی قسم کےحادثے کا اندیشہ رہے۔‘‘