فروری کے مقابلے مارچ میں ہندوستان کے نجی شعبے کی ترقی میں قدرے کمی آئی ہے۔

فروری کے مقابلے مارچ میں ہندوستان کے نجی شعبے کی ترقی میں قدرے کمی آئی ہے۔ ایچ ایس بی سی کے فلیش پی ایم آئی سروے کے مطابق مینوفیکچرنگ سیکٹر میں ترقی دیکھی گئی  جبکہ خدمات کے شعبے کی رفتار کچھ کم ہوئی۔ سروے میں کہا گیا کہ ’’مارچ میں مینوفیکچرنگ سیکٹر بہتر کارکردگی کا مظاہرہ کرنے والا سیکٹر تھا۔ یہاں فروخت اور پیداوار میں اچھا اضافہ ہوا، جو سروس سیکٹر سے زیادہ تھا۔‘‘ ایچ ایس بی سی کا فلیش پی ایم آئی انڈیکس فروری میں۵۸ء۸؍ سے گر کر مارچ میں۵۸ء۶؍ پر آگیا۔ یہ انڈیکس ہر ماہ مینوفیکچرنگ اور خدمات کے شعبوں کی مشترکہ ترقی کی پیمائش کرتا ہے۔ یہ انڈیکس لگاتار ۴۴؍ ویں مہینے۵۰؍ سے اوپر رہا، جو معیشت میں مضبوطی کو ظاہر کرتا ہے۔

یہ بھی پڑھئے: رونالڈو کی ٹیم پرتگال یوئیفا نیشنز لیگ کے سیمی فائنل میں پہنچی

سروے کے مطابق ہندوستان کی نجی شعبے کی معیشت نے مالی سال ۲۵۔۲۰۲۴ء کو مضبوط پوزیشن میں ختم کیا ہے۔ نئے آرڈرس اور آؤٹ پٹ اچھی طرح سے بڑھتے رہے ہیں۔ اگرچہ فروری کے مقابلے میں ترقی قدرے سست تھی، لیکن یہ طویل مدتی اوسط سے اب بھی زیادہ ہے۔‘‘
مینوفیکچرنگ سیکٹر نے نئے آرڈرس، پیداوار، روزگار، ترسیل کے اوقات اور انوینٹری جیسے پہلووؤں میں بہتری دیکھی، جو پورے سال کے اوسط کے آس پاس رہی۔ ایچ ایس بی سی کے فلیش پی ایم آئی ڈیٹا کے مطابق مارچ میں پیداوار میں اچھا اضافہ ریکارڈ کیا گیا، جو جولائی ۲۰۲۴ء کے بعد سے بلند ترین سطح ہے۔
ایچ ایس بی سی کے چیف انڈیا اکانومسٹ پرنجول بھنڈاری نے کہا کہ مینوفیکچرنگ سیکٹر میں تیزی سے ترقی دیکھی گئی ہے  تاہم  کمپنیوں کو مارجن پر دباؤ کا سامنا کرنا پڑا۔ ان پٹ لاگت میں اضافہ دیکھا گیا، جبکہ فیکٹری گیٹ کی قیمتیں، یعنی فروخت کی قیمتیں، ایک سال میں سب سے سست شرح سے بڑھیں۔ نئے برآمدی آرڈرس کی نمو بھی ٹیرف کے اعلانات کے درمیان کچھ سست پڑ گئی۔روزگار کے محاذ پر سروے نے انکشاف کیا کہ نئی ملازمتوں کی رفتار ۶؍ ماہ کی کم ترین سطح پر پہنچ گئی ہے۔