ادھو ٹھاکرے کے خیمے نے راہل نارویکر کے ایکناتھ شندے کی شیوسینا کو اصل شیوسینا قرار دینے کے فیصلے کو سپریم کورٹ میں چیلنج کیا ہے۔ خیال رہے کہ نارویکر نے شندے شیوسینا کے حق میں فیصلہ سنایا ہے اور انہیں اصل شیوسینا قرار دیا ہے۔

ادھو ٹھاکرے شیوسینا نے قانون ساز اسمبلی کے اسپیکر راہل نارویکر کے ایکناتھ شندے کی شیوسینا کو اصل شیوسینا قرار دینے کے فیصلے کو سپریم کورٹ میں چیلنج کیا ہے۔ واضح رہے کہ نارویکر نے ادھو ٹھاکرے کی ۱۶؍ ایم ایل ایز کو معطل کرنے کی درخواست بھی مسترد کر دی ہے۔ نارویکر نے ایم ایل ایز کو معطل کرنے سے نہ صرف انکار کیا بلکہ انہوں نے یہ بھی کہا تھا کہ ادھو ٹھاکرے کو یہ اختیار نہیں ہے کہ وہ ایکناتھ شندے کو شیوسینا سے بے دخل کریں۔ خیال رہے کہ ۱۸؍ ماہ قبل ایکناتھ شندے نے ادھو ٹھاکرے سے بغاوت کر کے بی جے پی کے ساتھ ہاتھ ملا لیا تھا اور ایک الگ پارٹی قائم کی تھی۔ نارویکر نے شندے کو وزیر اعلیٰ کے عہدے پر بھی قائم رکھنے کا فیصلہ کیا ہے۔ نارویکر نے فیصلہ سناتے ہوئے نشاندہی کی تھی کہ شندے کو جون ۲۰۲۲ء  جب شیوسینا تقسیم ہوئی تھی، کو ۵۷؍ ایم ایل ایز میں سے ۳۶؍ ایم ایل ایز کی حمایت حاصل تھی۔ ۲۰۲۳ کے اوائل میں الیکشن کمیشن نے پارٹی کا نام اور علامت بھی شندے کے خیمے کو سونپ دی تھی۔