وزیر خارجہ ایس جے شنکر نے پیر کو کریملن میں روسی صدر ولادیمیر پوتن سے ملاقات کی اور ہند روس کے درمیان اقتصادی تعاون میں نمایاں اضافے کو اجاگر کیا۔ دونوں ممالک نے تجارت، توانائی، کھاد، جوہری توانائی اور ٹیکنالوجی کے شعبوں میں تعاون مزید مضبوط بنانے پر بھی توجہ مرکوز کی۔

وزیر خارجہ ایس جے شنکر نے پیر کو کریملن میں روسی صدر ولادیمیر پوتن سے ملاقات کی اور ہند روس کے درمیان اقتصادی تعاون میں نمایاں اضافے کو اجاگر کیا۔ دونوں ممالک نے تجارت، توانائی، کھاد، جوہری توانائی اور ٹیکنالوجی کے شعبوں میں تعاون مزید مضبوط بنانے پر بھی توجہ مرکوز کی۔ دو روزہ دورہ ماسکو پر موجود جے شنکر نے ملاقات کے دوران وزیر اعظم مودی کی جانب سے پوتن کو نیک خواہشات پیش کیں اور ذاتی پیغام پہنچایا۔ انہوں نے دن کے اوائل میں منعقدہ ہندوستان-روس بین الحکومتی کمیشن کے اجلاس کے نتائج سے بھی روسی صدر کو آگاہ کیا۔جے شنکر نے پوتن سے کہا کہ ’’میں وزیر اعظم نریندر مودی کی نیک خواہشات پہنچانے سے آغاز کرنا چاہوں گا۔ انہوں نے آپ کے لیے ایک ذاتی پیغام دیا ہے جو میں آپ کے حوالے کرنا چاہتا ہوں۔‘‘

یہ بھی پڑھئے: غزہ جنگ بندی کے ۳۱۵؍ دن میں ۴۳۷۹؍ اسرائیلی خلاف ورزیاں

دونوں ممالک کے درمیان اقتصادی تعاون سے متعلق کمیشن کے جائزے کا حوالہ دیتے ہوئے جے شنکر نے کہا کہ مجموعی صورتحال مثبت ہے۔انہوں نے کہا کہ مجموعی طور پر میرا خیال ہے کہ ہمارے اقتصادی تعاون میں بہت نمایاں اضافہ ہوا ہے۔جے شنکر نے وزیر اعظم مودی کی پوتن کے ساتھ آئندہ ملاقاتوں کا بھی ذکر کیا اور کہا کہ ہندوستانی وزیر اعظم شنگھائی تعاون تنظیم (ایس سی او) سربراہی اجلاس میں روسی صدر سے ملاقات کے منتظر ہیں، جبکہ اس کے بعد نئی دہلی میں ہونے والے برکس سربراہی اجلاس میں ان کی میزبانی کریں گے۔بتادیں کہ ۱۸؍ واں برکس اجلاس آئندہ ۱۲؍ اور۱۳؍ ستمبر کونئی دہلی میں ہوگا ۔ ہندوستان اس سال برکس کی گردشی صدارت سنبھال رہا ہے جس کا موضوع لچک، جدت، تعاون اور پائیداری کیلئے اقدامات ہیں۔جے شنکر نے کہا وزیر اعظم مودی ایس سی او سربراہی اجلاس میں آپ سے ملاقات کے منتظر ہیں، اس کے بعد وہ برکس سربراہی اجلاس کے لیے ہندوستان میں آپ کا استقبال کریں گے۔