اوپیندرکشواہا کی پارٹی راشٹریہ لوک مورچہ میں ناراضگی اور بے چینی کا سلسلہ تھمنے کا نام نہیں لے رہا ہے۔ تازہ معاملہ پارٹی صدر کی لٹی چوکھا دعوت میں۴؍میں سے ۳؍اراکین اسمبلی کے نہیں پہنچنے کی اطلاع ہے۔ بدھ کو شام میں منعقدہ اوپیندر کشواہا کی لٹی چوکھا پارٹی میں وہی ۳؍ اراکین اسمبلی نہیں پہنچے تھے جنہوں نےدن میں بی جےپی کے کارگزار قومی صدرنتن نوین سےملاقات کی تھی۔اس سے راشٹریہ لوک مورچہ میں ٹوٹ پھوٹ کی قیاس آرائیاں ایک بارپھر تیز ہوگئی ہیں۔ 

یاد رہے کہ اوپیندر کشواہا نے بدھ کو شام میں اپنی رہائش گاہ پر لٹی چوکھا کی دعوت کی تھی۔ اس میں بہت سے لوگ پہنچےتھےلیکن ان کی ہی پارٹی کے ۳؍ ایم ایل اے مادھو آنند، رامیشور مہتو اور آلوک سنگھ غائب  رہے۔ اوپیندر کشواہا کی پارٹی میں ٹوٹ پھوٹ کی قیاس آرائیوں کی ایک بڑی وجہ رامیشور مہتو کا بی جے پی کے کارگزار قومی صدر نتن نوین سے ملاقات کے لیے دہلی کا بھی سفر بھی ہے۔ اس سے قبل بھی راشٹریہ لوک مورچہ کے اندر اختلافات کی باتیں سامنے آتی رہی ہیں۔

اس تعلق سے جب ’انقلاب‘ کے نمائندہ نےراشٹریہ لوک مورچہ کے ترجمان رام پکار سنہا سے پوچھا تو انہوں نے کہا کہ’ ’یہ پارٹی دراصل میڈیا والوں کیلئے رکھی گئی تھی۔ اس میں شرکت کیلئےپارٹی لیڈروں کے ساتھ ہی متعدد شخصیات کو بھی دعوت دی گئی تھی۔ لیکن اس میںکئی لوگ نہیں آسکے کیونکہ ان کا پہلے سے پروگرام طے تھا۔‘‘انہوں نے ایک سوال کے جواب میں کہا کہ پارٹی متحد ہےاور سبھی لیڈران اور اراکین اسمبلی ہمارے قائدکی پالیسی اور قیادت میں پوری مضبوطی سے یقین رکھتے ہیں۔