وجے ہزارے ٹرافی کے پہلے دن کوہلی، روہت، ایشان کشن، پڈیکل اور ویبھو شوریہ ونسی سمیت۲۲؍ کھلاڑیوں نے شاندار اننگز کھیلی اور سنچریاں بنائیں۔  وجے ہزارے ٹرافی۲۶-۲۔۲۵ء کا پہلا دن مکمل طور سے بلے بازوں کے نام رہا۔ ملک کے مختلف میدانوں پر کھیلے گئے مقابلوں میں گیند باز بے بس نظر آئے اور کئی سارے ریکارڈ بن گئے۔ ایک ہی دن میں۲۲؍ بلے بازوں نے سنچریاں اسکور کیں، جس کی وجہ سے اس گھریلو ونڈے ٹورنامنٹ کا پرانا ریکارڈ ٹوٹ گیا۔ اس سے قبل ایک دن میں سب سے زیادہ۱۹؍ سنچریاں بنائی گئی تھیں۔ اس تاریخی دن پر وراٹ کوہلی، روہت شرما، ایشان کشن، دیودت پڈیکل اور ویبھو شوریہ ونسی جیسے بڑے ناموں نے شاندار اننگز کھیلی، لیکن اصل سرخی ادیشہ کے ایک غیرمعروف بلے باز سواستک سامل نے حاصل کرلی ۔

۱۵؍سال بعد وجے ہزارے ٹرافی میں لوٹے وراٹ کوہلی نے دہلی کی جانب سے کھیلتے ہوئے آندھرا پردیش کے خلاف شاندار سنچری اسکور کی۔ وراٹ کوہلی  نے ۱۰۱؍ گیندوں پر۱۳۱؍  رنوں کی اننگ کھیلی۔ نتیش رانا(۷۷؍رن) اور پریانش آریہ(۷۴) رن نے کوہلی کا بخوبی ساتھ نبھایا۔ دہلی نے کوہلی کی سنچری کی بدولت۲۹۹؍ رنوں کا ہدف صرف۳۷ء۴؍ اوورس میں حاصل کر لیا۔ اس سنچری کے ساتھ وراٹ کوہلی نے لسٹ اے کرکٹ میں ۱۶۰۰۰؍ رن بھی  پورے کر لیے اور یہ مقام سب سے کم اننگ میں حاصل کرنے والے بلے باز بن گئے۔ممبئی کی جانب سے کھیلتے ہوئے روہت شرما نے بھی سکم کے خلاف ۹۴؍  گیندوں میں ۱۵۵؍ رنوں کی شاندار اننگ کھیلی۔ اس اننگ میں روہت  نے ۱۸؍ چوکے  اور۹؍ چھکے لگائے۔ ممبئی  نے ۲۳۷؍  رنوں کا ہدف۳۰ء۳؍ اوورس میں حاصل کر لیا۔ روہت اور کوہلی کے علاوہ جھارکھنڈ کے لیے کھیلتے ہوئے ایشان کشن نے کرناٹک کے خلاف صرف۳۹؍ گیندوں میں۱۲۵؍ رن بنا ڈالے۔ ایشان نے اپنی اننگ میں۷؍ چو کے  اور۱۴؍ چھکے لگا کر ٹیم کا مجموعی اسکور۴۱۲؍ رنوں تک پہنچا دیا۔ حالانکہ دیودت پڈیکل  کے ۱۴۷؍ رنوں کی بدولت کرناٹک  نے ۴۱۲؍ رنوں کا مشکل ہدف آسانی سے حاصل کر لیا۔پلیٹ گروپ میں بہار نے اروناچل پردیش کے خلاف تاریخ رقم کر دی۔ بہار  نے۶؍وکٹ کے نقصان پر۵۷۴؍ رن بنائے، جو لسٹ اے کرکٹ کا نیا عالمی ریکارڈ ہے۔ کپتان شکیب الغنی نے صرف۳۲؍ گیندوں میں سنچری اسکور کی، جبکہ نوجوان بلے باز ویبھو شوریہ ونسی نے ۸۴؍ گیندوں میں ۱۹۰؍ رن بنائے۔ ان دونوں کے علاوہ آیو لوہاروکا نے بھی۱۱۶؍ رنوں کی شاندار اننگ کھیلی۔ بہار نے اپنی اننگ میں مجموعی طور پر۴۹؍ چوکے اور۳۸؍ چھکے لگائے۔واضح رہے کہ ان بڑے ناموں کے ساتھ ساتھ ارپت بھٹیورا، رکی بھوئی، یش دوبے، سمر گجر، سنیہل کوتھنکر، شبھم کھجوریا، کشن لنگدوہ، امن مکھڑے، ہمانشو رانا، روی سنگھ، دھرو شوری، فیروزمنجوتن، وشنو ونود اور بپلب سامنترے جیسے نوجوان کھلاڑیوں نے بھی بہترین اننگز کھیلتے ہوئے سنچریاں اسکور کیں اور پہلے ہی دن وجے ہزارے ٹرافی میں تاریخ رقم کر دی۔

ان تمام اننگز کے درمیان ادیشہ کے ۲۵؍ سالہ بلے باز سواستک سامل نے سب کی توجہ اپنی طرف مرکوز کر لی۔ انہوں نے سوراشٹر کے خلاف۱۶۹؍ گیندوں میں ۲۱۲؍ رن بنائے، اس شاندار اننگ میں ۲۱؍ چوکے اور۸؍چھکے شامل تھے۔ وہ ادیشہ کی جانب سے لسٹ اے کرکٹ میں ڈبل سنچری بنانے والے پہلے بلے باز بن گئے۔ حالانکہ ان کی ٹیم میچ جیت نہیں پائی، لیکن سامل کی اننگ نے انہیں توجہ کا مرکز بنا دیا۔ مجموعی طور پر وجے ہزارے ٹرافی کا پہلا دن ریکارڈز اور رنوں سے بھرپور رہا، جس نے ٹورنامنٹ کو مزید دلچسپ بنا دیا۔

وجے ہزارے ٹرافی کے پہلے دن کی کچھ باتیں...
بڑے ناموں کے ساتھ ساتھ ارپت بھٹیورا، رکی بھوئی، یش دوبے، سمر گجر، سنیہل کوتھنکر، شبھم کھجوریا، کشن لنگدوہ، امن مکھڑے، ہمانشو رانا، روی سنگھ، دھرو شوری، فیروزمنجوتن، وشنو ونود اور بپلب سامنترے جیسے نوجوان کھلاڑیوں نے بھی بہترین اننگز کھیلتے ہوئے سنچریاں اسکور کیں اور پہلے ہی دن تاریخ رقم کر دی۔
 اس سے قبل ایک دن میں سب سے زیادہ۱۹؍ سنچریاں بنائی گئی تھیں۔
وراٹ کوہلی نے اپنی سنچری کے ساتھ لسٹ اے کرکٹ میں ۱۶۰۰۰؍ رن بھی  پورے کر لئے۔
ادیشہ کے ۲۵؍ سالہ بلے باز سواستک سامل نے۱۶۹؍ گیندو ںمیں ۲۱۲؍ رن بنائےجو وجے ہزارے ٹرافی کا سب سے  بڑا انفرادی اسکور ہے۔