امریکہ میں پلے اسٹیشن کے لاکھوں صارفین معاوضے کے اہل ہو سکتے ہیں کیونکہ سونی نے ڈیجیٹل گیمز کی قیمتوں سے متعلق ایک مقدمے میں ۸۵ء۷؍ ملین ڈالر کے تصفیے پر رضامندی ظاہر کی ہے۔ اس مقدمے میں سونی پر الزام لگایا گیا تھا کہ اس نے ۲۰۱۹ء میں پلے اسٹیشن گیم واؤچرز کی تھرڈ پارٹی فروخت بند کر کے مسابقت کو محدود کیا۔

امریکہ بھر میں پلے اسٹیشن نیٹ ورک کے لاکھوں صارفین کو معاوضہ مل سکتا ہے کیونکہ سونی نے پلے اسٹیشن اسٹور پر ڈجیٹل گیمز کی فروخت سے متعلق ایک کلاس ایکشن مقدمے میں مجوزہ تصفیہ کر لیا ہے۔ امریکی ڈسٹرکٹ کورٹ برائے شمالی ضلع کیلیفورنیا نے۸؍ اپریل کو۸۵ء۷؍ ملین ڈالر کے اس تصفیے کی ابتدائی منظوری دے دی۔ سیوری لا فرم نے ۲۹؍ اپریل کو اس معاہدے کا عوامی اعلان کیا۔ مقدمے میں الزام لگایا گیا تھا کہ سونی نے ڈجیٹل گیمنگ مارکیٹ میں مسابقت کو محدود کیا جب کمپنی نے ریٹیلرز کو مخصوص گیمز کے پلے اسٹیشن ڈاؤن لوڈ واؤچرز فروخت کرنے کی اجازت دینا بند کر دی۔
یہ کیس ۲۰۲۳ء میں سامنے آیا، لیکن تنازع کئی سال پہلے شروع ہوا تھا۔ اپریل ۲۰۱۹ء میں سونی نے امیزون، والمارٹ اور ٹارگٹ جیسے بیرونی ریٹیلرز کے ذریعے ڈجیٹل گیم واؤچرز کی فروخت ختم کر دی۔ اس تبدیلی سے پہلے، کھلاڑی ریٹیل اسٹورز سے مخصوص پلے اسٹیشن گیمز کے واؤچرز خرید کر انہیں آن لائن پلے اسٹیشن اسٹور کے ذریعے استعمال کر سکتے تھے۔
جب سونی نے تھرڈ پارٹی فروخت کنندگان سے یہ واؤچرز ہٹا دیے تو صارفین کے پاس صرف یہ آپشن رہ گیا کہ وہ ڈجیٹل پلے اسٹیشن گیمز براہ راست سونی کے اپنے آن لائن اسٹور سے خریدیں۔ مدعیان کا مؤقف تھا کہ اس فیصلے نے قیمتوں میں مسابقت ختم کر دی اور سونی کو ڈجیٹل گیمز کی قیمتوں پر زیادہ کنٹرول دے دیا۔
مقدمے کی تفصیلات
یہ مقدمہ مارکیٹ میں اجارہ داری کے دعوؤں پر مبنی تھا۔ مدعیان کا کہنا تھا کہ جب سونی نے پلے اسٹیشن اسٹور کے باہر مخصوص گیم واؤچرز فروخت کرنا بند کیا تو اس نے ریٹیلرز کو ڈجیٹل گیمز کی قیمتوں میں مقابلہ کرنے سے مؤثر طور پر روک دیا۔عدالت کے دستاویزات کے مطابق  اپریل ۲۰۱۹ء کے بعد متاثرہ ڈجیٹل گیمز کی اوسط قیمتوں میں کم از کم ۵۰؍ سینٹ کا اضافہ ہوا، جو اس سے پہلے کی قیمتوں کے مقابلے میں زیادہ تھا جب واؤچرز ریٹیلرز کے ذریعے دستیاب تھے۔

یہ بھی پڑھئے:یوکرین کی مارٹا کوسٹیوک میڈرڈ اوپن کی نئی ملکہ

مدعیان کے وکلا نے مؤقف اختیار کیا کہ اگرچہ قیمت میں اضافہ معمولی تھا، لیکن کئی برسوں میں لاکھوں خریداریوں پر اس کا اثر نمایاں ہو جاتا ہے۔ مقدمے میں دعویٰ کیا گیا کہ کم مسابقت کی وجہ سے سونی کو مالی فائدہ ہوا کیونکہ صارفین کے پاس رعایتی ڈجیٹل گیم کوڈز خریدنے کے متبادل ذرائع نہیں رہے۔

یہ بھی پڑھئے:یوکرین کی مارٹا کوسٹیوک میڈرڈ اوپن کی نئی ملکہ

سونی نے مقدمہ طے کرنے پر رضامندی ظاہر کی، لیکن معاہدے کے تحت کسی غلطی کا اعتراف نہیں کیا۔یہ مجوزہ تصفیہ ان امریکی مکینوں پر لاگو ہوتا ہے جنہوں نے یکم  اپریل ۲۰۱۹ءسے ۳۱؍ دسمبر ۲۰۲۳ءکے درمیان پلے اسٹیشن نیٹ ورک کے ذریعے مخصوص ڈجیٹل گیمز خریدے تھے۔