ناندیڑ کی سمت تیز رفتاری سےجانے والی بس کے پچھلے دونوں ٹائر ایک جھٹکے سے نکلے جس کے سبب بس الٹ گئی ، جس وقت یہ حادثہ پیش آیا تب بس اولے کاسے گاؤں کے قریب پہنچ چکی تھی۔

اولے کاسے گاؤں میں اتوار کو مہاراشٹر اسٹیٹ روڈ ٹرانسپورٹ (ایم ایس آرٹی سی ) کی مسافروں سے بھری بس پلٹ گئی۔ اس حادثے میں ۱۰؍ مسافروں  کے زخمی ہونے کی اطلاعات ہیں  جن میں  سے ۳؍ مسافر شدید زخمی ہیں۔ رپورٹ کے مطابق شولاپور-دھولیہ قومی شاہراہ پر یہ حادثہ ناندیڑ کی سمت جانیوالی ایس ٹی بس کے ساتھ پیش آیا ہے۔
معاملے کی تفصیل یہ ہے کہ متاثرہ ایس ٹی بس علی الصباح ناندیڑ جارہی تھی۔ ابھی شولاپور بس اسٹینڈ سے نکلے بس کو پندرہ منٹ ہی ہوئے تھے کہ اولے کاسے گاؤں کے نزدیک بس کے پچھلے پہیے اچانک نکل گئے۔ اس باعث بس کا توازن بگڑا اور ہائی وے پر الٹ گئی۔ بس میں سوار مسافروں کی جان بچ گئی ہے۔ تاہم حادثے میں ۱۰؍ مسافر زخمی ہو گئے ہیں ، جن میں ۳؍ مسافروں  کو شدید چوٹیں  آئی ہیں ۔ زخمیوں  کو شولا پور کے گورنمنٹ اسپتال میں داخل کرایا گیا ہے۔ تادم تحریر یہ معلوم نہیں ہوسکا کہ حادثے سے دوچار ہونے والی بس کا نمبر کیا ہے اور اس میں کتنے مسافر سوار تھے۔ 
 اس واقعہ سے ایس ٹی کارپوریشن کی بدانتظامی کی پول ایک بار پھر کھل گئی ہے۔خیال رہے کہ ایک ہفتے میں ایس ٹی بس کا یہ دوسرا حادثہ ہے۔۲۱؍ نومبر (منگل) کی دوپہر، شولاپور سے لاتور جا رہی ایس ٹی بس کا اسٹیئرنگ خراب ہوا تھا اور ڈرائیور نے اسٹیئرنگ پر قابو کھو دیا تھا۔ اس وجہ سے ایس ٹی بس ڈیوائیڈر توڑکر سڑک کے کنارے گڑھے میں جاگری تھی۔ اس حادثے میں ۶؍ مسافر زخمی ہو گئے تھے۔