سینسیکس ۷۷؍ ہزار پر پہنچ کر بند ہوا، نفٹی بھی ۲۴؍ ہزار کے اوپر۔

خام تیل کی قیمتوں میں کمی اور آئی ٹی شعبے میں مضبوط خریداری کے باعث ہندوستانی شیئر بازار میں تیزی کا سلسلہ بدھ کو  چوتھے دن بھی جاری رہا اور بی ایس ای سینسیکس ۷۷؍ہزار کی سطح کو عبور کر گیا جبکہ نفٹی۲۴؍ہزار کے اوپر برقرار رہا۔ کاروبار کے دوران سینسیکس ۷۷؍ ہزار ۱۷۶؍ پوائنٹس تک پہنچ گیا جبکہ-۵۰؍ نفٹی نے  ۲۴؍ ہزار۹۷؍ کی سطح کو چھوا۔ مارکیٹ میں گزشتہ چار کاروباری سیشن کے دوران سینسیکس میں تقریباً  ۴؍ فیصد اور نفٹی میں۳ء۶؍ فیصد اضافہ درج کیا گیا ہے۔

ماہرین کے مطابق اس تیزی کی سب سے بڑی وجہ عالمی منڈی میں خام تیل کی قیمتوں میں مسلسل گراوٹ ہے۔ برینٹ کروڈ کی قیمت ۸۰؍ ڈالر فی بیرل سے نیچے آ کر تقریباً۷۸ء۵؍ ڈالر تک پہنچ گئی جس سے ہندوستان جیسے تیل درآمد کرنے والے ملک کیلئے معاشی دباؤ میں کمی کی امید پیدا ہوئی ہے۔ امریکہ اور ایران کے درمیان امن معاہدہ کی پیش رفت نے بھی سرمایہ کاروں کے اعتماد کو مضبوط کیا ہے۔ 

یہ بھی پڑھئے: ہندوستان اورتھائی لینڈ کا بہتر کاروباری روابط کا عزم

آئی ٹی کمپنیوں کے شیئر میں نمایاں خریداری دیکھی گئی۔ انفوسس، ٹاٹا کنسلٹنسی سروسز (ٹی سی ایس)، ایچ سی ایل ٹیک اور ٹیک مہندرا کے حصص میں اضافہ ریکارڈ کیا گیا، جبکہ ٹرینٹ اور ایٹرنل بھی نمایاں فائدہ اٹھانے والوں میں شامل رہے۔ دوسری جانب ایکسس بینک، بجاج فنانس، این ٹی پی سی اور اڈانی پورٹس کے حصص پر کچھ دباؤ دیکھا گیا۔مارکیٹ ماہرین کا کہنا ہے کہ جغرافیائی کشیدگی میں کمی، غیر ملکی سرمایہ کاروں کی واپسی اور خام تیل کی نرم قیمتیں قریبی مدت میں ہندوستانی ایکویٹی مارکیٹ کے لیے مثبت اشارے ہیں، تاہم عالمی حالات اور امریکی فیڈرل ریزرو کی پالیسی سے متعلق فیصلے سرمایہ کاروں کی حکمت عملی پر اثرانداز ہو سکتے ہیں۔تجزیہ کاروں کے مطابق اگر عالمی حالات سازگار رہے تو سینسیکس ۷۷؍ ہزار  ۵۰۰؍ کی سطح کی جانب بڑھ سکتا ہے۔