آئی سی سی ٹی ۲۰؍ ورلڈ کپ ۲۰۲۶ءء کا تاج سر پر سجانے کے بعد ہندوستانی ٹیم کے کپتان سوریہ کمار یادو نے اپنی اگلی منزل کا تعین کر لیا ہے۔

 آئی سی سی ٹی ۲۰؍ ورلڈ کپ ۲۰۲۶ءء کا تاج سر پر سجانے کے بعد ہندوستانی ٹیم کے کپتان سوریہ کمار یادو نے اپنی اگلی منزل کا تعین کر لیا ہے۔ احمد آباد میں کھیلے گئے فائنل میں نیوزی لینڈ کو شکست دینے کے بعد پریس کانفرنس کرتے ہوئے ہندوستانی کپتان نے اعلان کیا کہ اب ان کی تمام تر توجہ ۲۰۲۸ء کے لاس اینجلس اولمپکس میں گولڈ میڈل جیتنے پر مرکوز ہے۔ 
کپتان سوریا کمار کا کہنا تھا کہ گزشتہ ایک ماہ کا سفر ٹیم کے لیے کسی خواب سے کم نہ تھا، جہاں تمام کھلاڑیوں نے متحد ہو کر بہترین کھیل پیش کیا اور آج ورلڈ کپ کی ٹرافی اس محنت کا ثمر ہے۔ انہوں نے مزید کہا کہ ’’اس عالمی کامیابی کے بعد اب ہمارا اگلا بڑا ہدف اولمپک پوڈیم پر کھڑے ہو کر اپنے ملک کے لیے سونے کا تمغہ حاصل کرنا ہے۔‘‘ 
واضح رہے کہ انٹرنیشنل اولمپک کمیٹی نے۱۹۰۰ء کے پیرس اولمپکس کے بعد پہلی بار کرکٹ کو دوبارہ اولمپک پروگرام کا حصہ بنایا ہے۔  ۲۰۲۸ء میں لاس اینجلس، امریکہ میں منعقد ہونے والے ان مقابلوں میں مردوں اور خواتین کے کرکٹ ایونٹس۱۴؍ سے ۲۹؍ جولائی تک شیڈول ہیں۔ 
گمبھیر اور سوریہ کمار نے جیت کا سہرا بے خوف کرکٹ  کے سر باندھ دیا
 ٹی ۲۰؍ ورلڈ کپ ۲۰۲۶ء کے فائنل میں نیوزی لینڈ کے خلاف  ہندوستان کی۹۶؍ رنز کی شاندار فتح، کپتان سوریہ کمار یادو اور ہیڈ کوچ گوتم گمبھیر کی ولولہ انگیز قیادت کا ثمر ہے۔ اس تاریخی جیت نے ثابت کر دیا کہ نڈر کرکٹ  کے ذریعے کسی بھی شک کو عالمی غلبے میں بدلا جا سکتا ہے۔

یہ بھی پڑھئے:ہماچل میں ریئل اسٹیٹ کے لیے پریمیم ایف اے آر اور ای وی چارجنگ پوائنٹس لازمی

نریندر مودی اسٹیڈیم میں ۸۶؍ہزار سے زائد تماشائیوں کے سامنے  ہندوستان نے دفاعی چیمپئن کے طور پر ٹائٹل بچا کر تاریخ رقم کی۔ کوچ گوتم گمبھیر نے ٹیم کی حکمت عملی پر روشنی ڈالتے ہوئے کہا  کہ ’’ٹی  ۲۰؍ فارمیٹ میں صرف ہائی رسک، ہائی ریوارڈ  کا طریقہ ہی کارگر ہے۔ اگر آپ ہارنے سے ڈریں گے تو کبھی جیت نہیں پائیں گے۔ ہمارا ہدف صرف جیتنا نہیں بلکہ  ۲۵۰۔ ۲۶۰؍ جیسے بڑے ٹوٹل بنانا تھا۔ ‘‘

یہ بھی پڑھئے:ٹی۲۰؍ ورلڈ کپ: ٹیم انڈیا کے چیمپئن بننے کے سفر میں یہ میچ ’ٹرننگ پوائنٹ‘ ثابت ہوا

انہوں نے مزید کہا کہ ہندوستانی کرکٹ میں اب انفرادی ریکارڈز  کے بجائے صرف ٹرافیوں پر توجہ دی جائے گی۔ کپتان سوریہ کمار یادو نے ٹیم میں ایسا کلچر پیدا کیا جہاں ہر کھلاڑی ایک دوسرے کے لیے کھیلتا ہے۔ سنجو سیمسن (پلیئر آف دی ٹورنامنٹ) نے اپنی شاندار واپسی پر گفتگو کرتے ہوئے کہا کہ ’’خدا کا میرے لیے الگ ہی منصوبہ تھا۔‘‘ ہندوستان نے فائنل میں ۵؍وکٹ پر۲۵۵؍ رن  کا ریکارڈ اسکور بنایا جو ورلڈ کپ فائنل کی تاریخ کا سب سے بڑا مجموعہ ہے۔