احمد ال احمد کی دنیا بھر میں پزیرائی، ملزم کو پیچھے سے آکر دبوچ لیا، ۲؍ گولیاں لگیں مگرحملہ آور کو مزید فائرنگ کرنے دیا نہ بھاگنے دیا

 انہوں نے نے اپنی جان  پر کھیل جس طرح مسلح شخص کو قابو کیا اس کی وجہ سے ان کی دنیا بھر میں پزیرائی ہورہی ہے۔ ان کی یہ بہادری سی سی ٹی وی  میں قید ہوگئی ہے جس کا ویڈیو تیزی سے وائرل ہورہا ہے۔ حملہ آور کو قابو کرنے کے دوران احمد کو ۲؍گولیاں بھی لگیں۔  بعد میں زخمی  حالت میں  اسے اسپتال داخل کیاگیا۔ ڈاکٹرز کے مطابق گولیاں بازو پر لگی ہیں اور حالت خطرے سے باہر ہے۔احمد کے کزن، جن کی شناخت صرف مصطفیٰ کے نام سے ہوئی ہے، نے سینٹ جارج اسپتال کے باہر آسٹریلیائی خبر رساں  ادارہ ’سیون نیوز‘ سے بات کی، جہاں احمد کی سرجری جاری تھی۔ مصطفیٰ نے  بتایا کہ احمد نے حملہ آور کا مقابلہ کیا۔اس دوران ان کے اوپری بازو اور ہاتھ میں گولیاں لگیں۔مصطفیٰ  نے بتایا کہ ’’وہ اسپتال میں ہیں۔ ہمیں ابھی ٹھیک سے معلوم نہیں کہ کیا صورتحال ہے۔ امید ہے کہ وہ ٹھیک ہو جائیں گے۔ وہ اصلی ہیرو ہیں۔‘‘احمد سڈنی کے سدرلینڈ شائر سے تعلق رکھتے ہیں اور پھلوں کا کاروبار کرتے ہیں۔ ان کے پاس اسلحے کا کوئی تجربہ نہیں تھا اور وہ بونڈی آئے ہوئے تھے تبھی انہوں نے فائرنگ کا واقعہ ہوتے دیکھا اوراس میں کود پڑے۔احمد کی شناخت ظاہر ہونے سے پہلے میڈیا سے بات چیت میں وزیر اعظم انتھونی البانیز اور نیو ساوتھ ویلز کے وزیر اعلیٰ کرس منس نے ان کی بہادری کو سراہا۔ البانیزنے کہا کہ’’آج ہم نے آسٹریلوی شہریوں کو خطرے کی طرف بڑھتے دیکھا تاکہ دوسروں کی مدد کر سکیں۔ یہ آسٹریلوی ہیرو ہیں اور ان کی جرأت نے کئی جانیں بچائی ہیں۔‘‘