تل ابیب میں سیکڑوں افراد نے مظاہرہ کرتے ہوئے مقبوضہ مغربی کنارے میں فلسطینیوں کے خلاف بڑھتے ہوئے حملوں پر شدید تشویش کا اظہار کیا۔ مظاہرین نے ان کارروائیوں کو غیر انسانی قرار دیتے ہوئے فوری طور پر تشدد کے خاتمے اور مؤثر اقدامات کا مطالبہ کیا۔

۱۶؍اپریل کو تل ابیب میں سیکڑوں مظاہرین جمع ہوئے تاکہ مقبوضہ مغربی کنارے میں غیر قانونی اسرائیلی آبادکاروں کی جانب سے فلسطینیوں اور ان کی املاک پر کئے گئے حملوں کی مذمت کر سکیں۔ مظاہرین نے فلسطینی گھروں اور سامان کو نشانہ بنانے والے حملوں کی سخت الفاظ میں مذمت کی اور فوری طور پر اس تشدد کے خاتمے کا مطالبہ کیا۔ انہوں نے اس علاقے میں رہنے والے شہریوں پر حملوں کو ’’ظالمانہ اور نسل پرستانہ‘‘ قرار دیا اور مزید زیادتیوں کو روکنے کیلئے مضبوط اقدامات کرنے کی اپیل کی۔ 

یہ بھی پڑھئے: لبنان اسرائیل کا۱۰؍ روزہ جنگ بندی پر اتفاق

یاد رہے کہ یہ مظاہرے ایک ایسے پس منظر میں سامنے آئے ہیں جہاں مقبوضہ مغربی کنارے میں طویل عرصے سے کشیدگی برقرار ہے، خاص طور پر اسرائیلی آبادکاری کے پھیلاؤ اور فلسطینی آبادی کے ساتھ جھڑپوں کے باعث۔ مختلف انسانی حقوق کی تنظیمیں بارہا خبردار کر چکی ہیں کہ بعض اسرائیلی آبادکاروں کی جانب سے فلسطینی دیہاتوں، گھروں اور زرعی زمینوں پر حملوں میں اضافہ ہوا ہے، جن میں املاک کو نقصان پہنچانے اور شہریوں کو ہراساں کرنے کے واقعات شامل ہیں۔ دوسری جانب اسرائیلی حکومت پر تنقید کی جاتی رہی ہے کہ وہ ایسے حملوں کو روکنے میں مؤثر اقدامات نہیں کر پا رہی۔ اسی تناظر میں تل ابیب میں ہونے والے حالیہ مظاہرے دراصل ملک کے اندر سے اٹھنے والی اس آواز کی عکاسی کرتے ہیں جو ان حملوں کے خلاف ہے اور خطے میں امن و انصاف کے قیام کا مطالبہ کر رہی ہے۔