حیدرآباد میں منعقدہ دو روزہ’تلنگانہ رائزنگ گلوبل سمٹ‘کے دوسرے دن ایک لاکھ کروڑ روپے کی سرمایہ کاری کے معاہدوں پر دستخط ہوئے جبکہ پہلا دن ریاست کی اقتصادی ترقی کیلئے تاریخی ثابت ہوا۔ تلنگانہ حکومت نے پیر کو کل۴۳ء۲؍ لاکھ کروڑ روپے کی سرمایہ کاری کے معاہدوں پر دستخط کئے تھے۔ سرکاری پریس ریلیز کے مطابق پیر کو ۳۵؍ ایم او یوز کو حتمی شکل دی گئی تھی جو ریاست کو’ویژن۲۰۴۷ء‘ کیلئے ایک مضبوط معاشی طاقت کے طور پر قائم کرنے میں کلیدی کردار ادا کریں گے۔

سربراہی اجلاس کی سب سے بڑی توجہ ٹرمپ میڈیا اینڈ ٹیکنالوجی گروپ کی جانب سے بڑے پیمانے پر سرمایہ کاری تھی۔ کمپنی نے۴۱؍ ہزار کروڑ کی لاگت سے ایک بین الاقوامی میڈیا اور اسمارٹ ٹیکنالوجی ہب قائم کرنے پر اتفاق کیا ہے۔ یہ مرکز جدید ترین ڈیجیٹل انفراسٹرکچر، ایک ہائی ٹیک میڈیا ہب، اور جدید اسمارٹ ٹیکنالوجی کی سہولیات تیار کرے گا۔ اس سے آنے والے برسوں میں روزگار کے بڑے پیمانے پر مواقع پیدا ہوں گے اور عالمی ٹیکنالوجی کے نقشے پر تلنگانہ کی پوزیشن مزید مستحکم ہوگی۔

بالی ووڈ اداکار سلمان خان کی کمپنی، سلمان خان وینچرز انڈسٹریز نے ریاست میں ۱۰؍ ہزار کروڑ کی سرمایہ کاری کے ساتھ ایک مخصوص ٹاؤن شپ اور بین الاقوامی معیار کا فلم اور ٹی وی اسٹوڈیو قائم کرنے کے منصوبے کا اعلان کیا۔ یہ اسٹوڈیو جدید تفریحی سہولیات، شوٹنگ کے مقامات اور پوسٹ پروڈکشن ٹیکنالوجیز سے لیس ہوگا۔ اس کی ترقی تلنگانہ فلم انڈسٹری کو نئی بلندیوں تک لے جائے گی اور اسے ایک قومی تفریحی مرکز کے طور پر قائم کرنے میں مدد کرے گی۔

بروک فیلڈایکسس وینچرز کنسورشیم نے تلنگانہ کے مجوزہ ’بھارت فیوچر سٹی‘ میں۷۵؍ ہزار کروڑ کے سرمایہ کاری کے معاہدے پر دستخط کئے ہیں۔ یہ منصوبہ ایک عالمی تحقیق اور ترقی کا مرکز اور ایک گہرا ٹیک ہب تیار کرے گا۔ یہ پروجیکٹ اسٹارٹ ایپس، اے آئی، روبوٹکس اور جدید ٹیکنالوجیز کیلئے ایک بین الاقوامی سطح کا ماحولیاتی نظام تشکیل دے گا، جس سے تلنگانہ کو مستقبل کی ٹیکنالوجیز کیلئے ایک مرکز کے طور پر جگہ ملے گی۔

جی ایم آر گروپ نے ایرو اسپیس اور دفاعی شعبوں میں۱۵؍ ہزار کروڑ کی سرمایہ کاری کے ساتھ ایک مفاہمت نامے پر دستخط کئے ہیں۔ اس سرمایہ کاری کا استعمال کارگو کی سہولیات کو بڑھانے اور مرمت، دیکھ بھال، اور تجدید کاری خدمات کی ترقی کیلئے کیا جائے گا۔ اس سے ریاست کے ایرو اسپیس سیکٹر کو نمایاں طور پر تقویت ملے گی۔

ریاست کے صنعتی  وزیر سری دھر بابو نے کہا کہ مختلف شعبوں کی کمپنیاں، گہری ٹیک سے لے کر ٹیکسٹائل تک، تلنگانہ کی مستحکم اور حوصلہ افزا صنعتی پالیسی پر اعتماد ظاہر کر رہی ہیں۔ انہوں نے کہا کہ پہلے دن دستخط کئے گئے سرمایہ کاری کے معاہدوں سے یہ ظاہر ہوتا ہے کہ تلنگانہ تیزی سے عالمی سرمایہ کاری کیلئے ایک پسندیدہ مقام بنتا جا رہا ہے۔

تلنگانہ کے نائب وزیراعلیٰ ملوبھٹی وکرامارکا نےمنگل کو کہا کہ ریاست کی معاشی ترقی اور۳؍ ٹریلین ڈالر معیشت کا نشانہ تب ہی ممکن ہے جب نجی شعبہ کے ساتھ مضبوط شراکت قائم کی جائے۔ انہوں نے کہا کہ پبلک پرائیویٹ پارٹنرشپ (پی پی پی) ریاست کی ترقی میں مرکزی کردار ادا کرے گی۔وہ سمٹ میں ’انوویٹوپی پی پیز: عوامی فلاح کیلئے نجی سرمایہ کاری کا استعمال ‘کے موضوع پر منعقد پینل مباحثہ سے بطور مہمانِ خصوصی خطاب کر رہے تھے۔ انہوں نے کہا کہ ہر گزرتے دن کے ساتھ ریاست اپنے ہدف کے قریب ہوتا جارہا ہے۔