نائب وزیر اعلیٰ ایکناتھ شندے کی موجودگی میں بی جے پی کے سابق ا سٹینڈنگ کمیٹی کے چیئر مین پارٹی میں شامل جبکہ شندے سینا کے سابق کارپوریٹروں نے گزشتہ روزبی جے پی میںشمولیت اختیار کی تھی

 مہاراشٹر کی سیاست میں  مہا یوتی کے درمیان جاری سرد جنگ اب کلیان اور ڈومبیولی کے مقامی سیاسی منظرنامے میں کھل کر سامنے آنے لگی ہے۔ شیو سینا( شندے) اور بی جے پی دونوں اتحاد کا حصہ ہونے کے باوجود ایک دوسرے  کے بااثرلیڈروں اور کارکنان کو اپنی جماعت میں شامل کرنے کی کوششوں میں مصروف ہیں۔ اتوار کی صبح بی جے پی نے شیوسینا اور کانگریس کے ۷؍ سابق کارپوریٹروں نے بی جے پی میں شمولیت اختیار کی تھی۔اس کے جواب میں شام ہوتے ہوتے  شندے سینا نے بھی ڈومبیولی کے قد آورلیڈر سمیت ۵؍ عہدیداروں کو ’تیرکمان‘ تھما دیا۔کئی حلقوں میں یہ سوال بھی اٹھایا جا رہا ہے کہ اگر یہی رویہ برقرار رہا تو مہایوتی اتحاد کی یکجہتی پر براہ راست اثر پڑ سکتا ہے۔
 کلیان اور ڈومبیولی میں بی جے پی اور شیو سینا (شندے) کے درمیان سیاسی جوڑ توڑ نے نیا رخ اختیار کر لیا ہے۔ بی جے پی کے ریاستی صدر رویندر چوہان نے دونوں شیوسینا اور کانگریس کے ۵؍ عہدیداروں اور چند سابق کارپوریٹروں کو اپنے خیمے میں شامل کر کے سیاسی برتری حاصل کرنے کی کوشش کی تھی۔تاہم شیو سینا (شندے )نے اس سیاسی چال کا فوری جواب دیا۔محض چند گھنٹوں کے اندر بی جے پی کے سابق کارپوریٹر وکاس مہاترے اور ان کی اہلیہ کویتا مہاترے نے نائب وزیراعلیٰ ایکناتھ شندے کی موجودگی میں شیو سینا (شندے) میں شمولیت اختیار کر کے سیاسی پلڑا برابر کر دیا۔
 اس موقع پر وکاس مہاترے نےکہا کہ وہ بی جے پی کی مقامی قیادت کے رویے سے سخت ناراض تھے۔ ان کے مطابق ان کے علاقے کے ترقیاتی کاموں اور فنڈز کو دانستہ طور پر نظرانداز کیا گیا جس کے نتیجے میں ان کے حامیوں میں بھی مایوسی کی فضا پیدا ہوئی۔اتوار کو ہونے والے اس سیاسی ادل بدل کے بعد شہر کاسیاسی پارہ کافی بلند ہوگیا ہے۔ دونوں اتحادی جماعتوں کے درمیان بڑھتی کشمکش پر ایم این ایس  کے لیڈر راجو پاٹل نے سخت ردعمل ظاہر کرتے ہوئے کہا کہ یہ سارا تماشہ دراصل بدعنوانی، ناقص انتظامیہ اور شہری مسائل سے عوام کی توجہ ہٹانے کی ایک کوشش ہے۔