اسلام جمخانہ میں مشاورتی میٹنگ میں یو سی سی اور تبدیلیٔ مذہب قانون پر ذمہ دار شخصیات نے حکومت کی نیت پر سوال قائم کرتے ہوئے اسے آئین مخالف قرار دیا۔

یکساں سول کوڈ کے تعلق سے مہاراشٹر میں صورتحال کا جائزہ لینے اور مختلف مذاہب کی شخصیات کے مابین باہمی تبادلۂ خیال کی غرض سے اسلام جمخانہ میں ایک مشاورتی میٹنگ کا انعقاد کیا گیا۔ یہ میٹنگ سنیچر کی شب میں اسلام جمخانہ میں مہاراشٹر مسلمس فیڈریشن کی جانب سے کی گئی۔ اس اہم مسئلے  پر حاضرین نے اتفاق کیا کہ یو سی سی کے تعلق سے حکومت کی نیت ٹھیک نہیں، حکومت ایک مذہبی گروہ کو نشانہ بنانے کی کوشش کر رہی ہے ۔ اتنا ہی نہیں اس تعلق سے حکومت کا رویہ دستور مخالف بھی ہے ۔

میٹنگ کی سربراہی کرتے  ملک معتصم (جماعت اسلامی کے نائب امیر) نے یہ اعتراف کیا کہ مسلمانوں میں تبدیلی کی ضرورت ہے۔ اسی طرح ہمیں اس کا احساس ہے کہ ہم اپنا احتساب کریں لیکن قرآن اور حدیث میں ہمیں جو احکامات دیئے گئے ہیں وہ ناقابلِ تنسیخ ہے، اس میں کسی بھی قسم تبدیلی نہیں کی جا سکتی، ان پر عمل  ہمارے ایمان کا حصہ ہے۔

یہ بھی پڑھئے: ادب نیا پرانا نہیں ہوتا، اس میں عجائب خانے نہیں ہوتے!

مولانا محمود خان دریابادی نے کہا کہ آرٹیکل ۲۵؍ہمیں اپنے  مذہب پر اور آرٹیکل۲۶؍ہمیں مسلک پر عمل کرنے کی اجازت دیتا ہے، اس سے وہ متاثر ہوگا ۔ انہوں نے زور دے کر یہ بھی کہا کہ یاد رکھنا چاہئے کہ یہ محض مسلمانوں کا مسئلہ نہیں ہے دیگر مذاہب کے پرسنل لاز بھی متاثر ہوں گے۔ اسی طرح آرٹیکل۴۴؍میں رہنمائی کی گئی ہے مگر وہ بنیادی دفعہ نہیں ہے، غیر ضروری طور پر آرٹیکل۴۴؍کا حکومت کے ذریعے سہارا لیا جارہا ہے جبکہ جن ہدایات کا اس سے تعلق ہے حکومت اس سے صرف نظر کررہی ہے۔

مفتی حذیفہ قاسمی (جمعیۃ علماء مہاراشٹر) نے کہا کہ یو سی سی سے متعلق یہ کہا جارہا ہے کہ اس سے سب یکساں ہوجائیں گے، میں پوچھتا ہوں کہ کیا ایک گھر میں سب ایک طرح سے ہوجائیں گے۔ اس لئے آنکھ میں دھول نہ جھونکی جائے، ہندوستان میں اس پر عمل ممکن نہیں ہے۔ اسی طرح وکلاء حضرات خاص طور پر اسے اجاگر کریں کہ  آرٹیکل۴۴؍ محض مشورہ ہے وہ بنیادی دفعہ کے مقابلے ٹک نہیں سکتا۔  

کمیٹی تشکیل دینے پر اتفاق 
میٹنگ کے دوران پندرہ بیس افراد پر مشتمل ایک کمیٹی کی تشکیل پر اتفاق ہوا ۔ تشکیل دی جانے والی کمیٹی پوری طرح یو سی سی پر اپنی توجہ مرکوز کرتے ہوئے حکومت کے غلط فیصلوں پر اسے متنبہ کرے گی ۔