نیویارک ٹائمس کا دعویٰ، ایک رپورٹ میں کہا گیاکہ ٹرمپ سمجھتے تھےکہ ان کے اختیارات کی کوئی حد نہیں ہے لیکن اب انہیں کئی حدود کا سامنا کرنا پڑ رہا ہے جس کے باعث وہ مزید مایوسی اور جھنجھلاہٹ کا شکار ہیں،اخبار کے مطابق ٹرمپ کے پاس ایران میںاپنامقصد حاصل کرنے کا کوئی واضح راستہ نہیں ہے ۔

امریکی اخبار نیویارک ٹائمز کا کہنا ہےکہ امریکی صدر ڈونالڈ ٹرمپ ایران جنگ میں پھنسے ہوئے دکھائی دیتے ہیں، حالانکہ ان کے پاس دنیا کی سب سے طاقتور فوج ہے۔نیویارک ٹائمز کی رپورٹ میں کہا گیا ہےکہ ٹرمپ سمجھتے تھےکہ ان کے اختیارات کی کوئی حد نہیں لیکن اب انہیں کئی حدود کا سامنا کرنا پڑ رہا ہے جس کے باعث وہ مزید مایوس اور جھنجھلاہٹ کا شکار ہیں۔امریکی اخبار کا کہنا ہےکہ حالیہ عرصے میں دیکھا جارہا ہےکہ ٹرمپ خود کو پھنسا ہوا محسوس کررہے ہیںکیونکہ ان کی صدارت آہستہ آہستہ ایسی جنگ میں گھرتی جا رہی ہے جس سے نکلنےکا وہ کوئی راستہ تلاش نہیں کر پا رہے ہیں۔ انہوں نے۲۸؍ فروری کو ایران کے خلاف مکمل جنگی کارروائیاں شروع کیں اور ایران کے جوہری پروگرام کو فوری طور پر ختم کرنے اور حکومت کا تختہ الٹنے کے اہداف مقرر کیے۔تاہم۵؍ ماہ بعد بھی یہ اہداف حاصل نہیں ہوسکے اور ٹرمپ اب ایران کے خلاف  بڑے پیمانے پر دوبارہ فوجی کارروائی شروع کرنے سے ہچکچا رہے ہیںکیونکہ امریکی انٹیلی جنس اداروں کا اندازہ ہےکہ ایران میں یہ حکمت عملی اتنی مؤثر ثابت نہیں ہوگی۔

یہ بھی پڑھئے: غزہ کے مخصوص علاقوں میں بین الاقوامی فورس کو داخلے کی اجازت

نیویارک ٹائمس کے مطابق صدر ٹرمپ کے پاس ایران میں اپنے مقصدکو حاصل کرنےکا کوئی واضح راستہ نہیں ہے، وہ فتح کی حکمت عملی کے بغیر تنازع میں داخل ہوئے تھے اور اب وہ عزت بچاتے ہوئے نکلنے کا راستہ تلاش کر رہے ہیں ۔اخبار کے مطابق اب ٹرمپ کے سامنے تین بڑے راستے ہیں، فوجی کشیدگی میں اضافہ، معاشی دباؤ بڑھانا یا فتح کا اعلان کرکے نکل جانا۔ ان تمام راستوں پر حالیہ ہفتوں میں غور کیا گیا ہے لیکن  ہر راستہ مختلف وجوہات کی بنا پر ناقابل قبول دکھائی دیتا ہے۔ نیویارک ٹائمس کے مطابق  پورے ہفتے ایران میں بڑی فوجی کارروائی دوبارہ شروع کرنے کے اشارے دینے کے بعدگزشتہ جمعہ کو ٹرمپ پیچھے ہٹ گئےاورمزید حملے روکنے کا اعلان کردیا ۔

اخبار کے مطابق ٹرمپ کی اصل ہچکچاہٹ شاید یہ ہےکہ جنگ نے امریکی میزائل شکن نظام کے ذخائرکو کم کر دیا ہے۔ اس ماہ مسلسل۱۳؍ راتوں کے حملوں اور جوابی حملوں کے بعد بعض عہدیداروں کے مطابق یہ تعداد انتہائی کم سطح تک پہنچ چکی ہے۔ نیویارک ٹائمس کی ایک اور رپورٹ میں کہا گیا ہے کہ اپنے مشیروں کی جانب سے  ظاہر کئے گئے خدشات کے بعد ٹرمپ نے ایران کے خلاف بڑے پیمانے پر حملوں کا منصوبہ روک دیا۔ خدشات میں یہ بات شامل تھی کہ جنگ کو مزید طول دینے سےمشرقِ وسطیٰ میں موجود فضائی دفاعی گولہ بارود کے پہلے ہی کم ہوتے ذخائر ختم ہوسکتے ہیں۔اپریل کے آخر میں نیویارک ٹائمس نے رپورٹ دی تھی کہ جنگ کے دوران پنٹاگن ۱۲۰۰؍ سے زیادہ پیٹریاٹ انٹرسیپٹر میزائل استعمال کر چکا ہے جن میں سے ہر ایک کی قیمت۴۰؍ لاکھ ڈالر سے زیادہ ہے۔

یہ بھی پڑھئے: امریکہ کے شہرسیئٹل میں سالانہ فوڈ فیسٹیول کے دوران فائرنگ