ٹرمپ کے بیان کے بعد، اپوزیشن لیڈر راہل گاندھی نے وزیر اعظم مودی پر سخت تنقید کی اور ان پر ”ٹرمپ سے خوفزدہ ہونے“ کا الزام لگایا۔

امریکی صدر ڈونالڈ ٹرمپ نے دعویٰ کیا ہے کہ وزیر اعظم نریندر مودی روسی تیل کی خریداری کو بند کرنے کیلئے راضی ہو گئے ہیں۔ انہوں نے اس پیش رفت کو یوکرین جنگ کے دوران روس کی آمدنی کو کم کرنے کی سمت ”بڑا قدم“ قرار دیا۔ ٹرمپ نے بدھ کو وہائٹ ہاؤس میں ایک پریس بریفنگ کے دوران کہا کہ مودی نے فون کال کے دوران انہیں یقین دلایا ہے کہ ہندوستان نے روس سے تیل کی درآمدات کو کم کرنے کا عمل شروع کر دیا ہے۔

ٹرمپ نے مزید کہا کہ ”وہ روس سے تیل نہیں خرید رہے ہیں۔ یہ عمل شروع ہو چکا ہے۔ آپ یہ فوری طور پر نہیں کر سکتے، لیکن یہ عمل جلد ہی ختم ہو جائے گا۔“ انہوں نے مزید کہا کہ روس سے تیل کی خریداری ختم کرنے سے روسی صدر ولادیمیر پوتن پر ”یوکرینیوں اور روسیوں کے قتل کو بند کرنے“ کیلئے دباؤ پڑے گا۔ امریکی صدر نے یہ بھی کہا کہ وہ چین کو بھی اسی طرح کی کارروائی کرنے کیلئے اس پر دباؤ ڈالنے کا ارادہ رکھتے ہیں۔

وزارت خارجہ کا بیان

ٹرمپ کے بیان کے جواب میں، وزارت خارجہ نے محتاط الفاظ پر مشتمل وضاحت جاری کی ہے۔ وزارت خارجہ کے ترجمان رندھیر جیسوال نے ایکس پر پوسٹ کئے گئے بیان میں کہا کہ ہندوستان کی توانائی پالیسی، سیاسی دباؤ سے نہیں، بلکہ اس کے شہریوں کیلئے سستی اور محفوظ فراہمی کو یقینی بنانے کے مقصد سے طے کی جاتی ہے۔ جیسوال نے کہا کہ ”ہندوستان تیل اور گیس کا ایک اہم درآمد کنندہ ہے۔ توانائی کے غیر مستحکم منظرنامے میں ہماری مستقل ترجیح ہندوستانی صارفین کے مفادات کا تحفظ کرنا ہے۔ ہماری درآمدی پالیسیاں مکمل طور پر اسی مقصد کے تحت بنائی جاتی ہیں۔“

امریکہ کے ضمن میں انہوں نے اس بات پر زور دیا کہ ہندوستان اپنی توانائی کی فراہمی کو متنوع بنانا جاری رکھے ہوئے ہے اور گزشتہ دہائی میں امریکہ کے ساتھ تعاون میں مسلسل اضافہ ہوا ہے۔ انہوں نے مزید کہا کہ ”مستحکم توانائی کی قیمتوں اور محفوظ فراہمی کو یقینی بنانا ہماری توانائی پالیسی کے دو اہم مقاصد ہیں۔“

اس سے قبل، وزیر خارجہ ایس جے شنکر نے رعایتی روسی خام تیل کی ہندوستان کی خریداریوں کا دفاع کرتے ہوئے کہا تھا کہ نئی دہلی اپنے شہریوں کے بہترین مفاد میں کام کرتا ہے۔ انہوں نے مغربی ممالک پر ”دوہرے معیار“ سے بچنے پر زور دیا تھا۔

راہل گاندھی کی مودی حکومت پر تنقید

ٹرمپ کے بیان کے بعد، اپوزیشن لیڈر راہل گاندھی نے وزیر اعظم مودی پر سخت تنقید کی اور ان پر ”ٹرمپ سے خوفزدہ ہونے“ کا الزام لگایا۔ کانگریس لیڈر نے ایکس پر لکھا کہ ”وزیر اعظم مودی ٹرمپ کو یہ فیصلہ کرنے اور اعلان کرنے کی اجازت دیتے ہیں کہ ہندوستان روسی تیل نہیں خریدے گا۔ وہ ان کی تردید نہیں کرتے اور کئی مرتبہ توہین کے باوجود مبارکباد کے پیغامات بھیجتے رہتے ہیں۔“