بھور گھاٹ میں پونے کی سمت جانیوالے ٹرک سے آہنی پائپ گرے اور پیچھے چل رہی گاڑیاں اس کی زد میں آئیں، ۶؍افراد زخمی، مفرور ٹرک ڈرائیور کے خلاف لاپروائی برتنے اور حادثہ کا سبب بننے کاکیس درج کرلیا گیا ہے۔

ممبئی پونے کو جوڑنے والے پرانے ہائی وے پر سنیچر کی رات ایک ٹرک سے آہنی پائپ گرنے سے  بھیانک حادثہ پیش آیا ہے۔ جس میں ۲؍افراد ہلاک ہوئے ہیں جبکہ ۶؍افراد زخمی ہیں۔ رپورٹ کے مطابق یہ حادثہ بھور گھاٹ کے قریب واقع ایچ او سی پل کے پاس پیش آیا ہے۔ یہاں سنیچر کی شام ایک تیز رفتار ٹرک سے دیو ہیکل پائپ گرنے کے نتیجے میں دو افراد ہلاک اور ۶؍افرادزخمی ہو گئے۔
 یہ ٹرک ممبئی سے پونے جا رہا تھا اور اس پر بڑے سائز کے آہنی پائپ لدے ہوئے تھے جو پل سے گزرتے وقت سڑک پر گر گئے۔ اس دوران ٹرک کے پیچھے چلنے والی ایک کار نے گرنے والے پائپوں سے بچنے کی کوشش کی، لیکن ایک پائپ سیدھا کارپر آ گرا، جس کے نتیجے میں کار ایک دو پہیہ گاڑی سے ٹکرا گئی ۔بائیک پرسوار۲۰؍سالہ روتیکا چوان جائے حادثہ پر ہی دم توڑگئی جبکہ ، جبکہ ۲۹؍سالہ ویبھو گلانڈے (وارجے، پونے ) کو شدید زخمی حالت میں کھوپولی کے جاکھوٹیا اسپتال منتقل کیا گیا۔کار میں سوار انکیتا شندے(۲۸)   ہلاک ہو گئیں، جبکہ دیگر چار افراد — سونالی کھڑادتے(۳۳)، شیوراج کھڑادتے(۶)،  لتا شندے(۵۰)  اور للت شندے (۳۰) زخمی ہوئے۔ یہ سبھی بھوسری، پونے کے رہنے والے ہیں اور انہیں ڈاکٹر بابا صاحب امبیڈکر میونسپل اسپتال، کھوپولی میں داخل کیا گیا۔یہ حادثہ شام۷؍بجے کے قریب پیش آیا، جس کے بعد ہائی وے پر ایک گھنٹے سے زیادہ وقت تک ٹریفک جام رہا۔ پولیس اور حادثہ رسپانس ٹیموں نے ملبہ ہٹا کر ٹریفک بحال کیا۔مقامی سماجی کارکن سنجے ماتھرے، انکش مورے اور دیگر نے زخمیوں کو اسپتال منتقل کرنے میں مدد کی۔
کھپولی پولیس کے مطابق ابتدائی تفتیش سے پتہ چلتا ہے کہ بھاری سامان کو محفوظ طریقے سے رکھنے میں سنگین غفلت برتی گئی، جس کی وجہ سے دو افراد کی جان گئی اور چھ زخمی ہوئے۔ ٹرک(کے اے۵۶۔۶۲۶۳) ممبئی سے پونے جا رہا تھا، اور اس پر لوہے کے بڑے پائپ لدے ہوئے تھے۔ پولیس کے مطابق، ڈرائیور کو اس بھاری سامان کے خطرات کا علم تھا، اس کے باوجود اس نے مناسب حفاظتی اقدامات نہیں کیے۔پولیس انسپکٹر سچن ہیرے کے مطابق:’’زخمیوں کو معمولی چوٹیں آئیں اور انہیں سنیچر کی رات دیر تک اسپتال سے فارغ کر دیا گیا۔ ڈرائیور نے نہ صرف سامان کو ٹھیک سے باندھنے میں کوتاہی کی بلکہ حادثے کے بعد موقع سے فرار بھی ہو گیا۔