ریاضی کنگ :مدنی اردو ہائی اسکول جوگیشوری میں دوسری جماعت میں زیر تعلیم میران قمررضوانی کی غیر معمولی ذہانت۔

اور اس کی بہن نظیفہ نے کتاب لکھی ہے

تیسری جماعت کی طالبہ کی یہ کتاب پکوانوں سے متعلق ہے جو امیزون پردستیاب ہے۔

میران کی بڑی بہن نظیفہ جو تیسری جماعت میں مدنی ہائی اسکول میں ہی زیر تعلیم ہے ، کو شروع سے کتابوں کے مطالعہ کاشوق رہا۔ ڈیڑھ سال کی عمرمیں اس نے انگریزی حرف مثلاً اے بی سی ڈی لکھنا شروع کر دیا تھاجبکہ ۴؍ سال کی عمر میں وہ انگریزی کہانیوں کی کتابیں پڑھنے لگی تھی ۔کتابوں کے درمیان پلنے بڑھنے سے اسے کتاب لکھنے کاشوق پیدا ہوا ۔اپنی خواہش کی تکمیل کیلئے اس نے ’’شیف لبوبو اینڈ فرینڈز‘‘ نامی کتاب تحریر کی ہے  جو ۸؍ابواب پر مشتمل ہے ۔ نظیفہ نے اپنی صلاحیتوں کا استعمال کرتے ہوئے یہ کتاب لکھی  ہے۔یہ کہانی شیف لبوبو کے مرکزی  کردا ر کے ارد گرد گردش کرتی ہے جو کہ مٹھائیوں کی سرزمین میں رہتا ہے ۔ وہاں اس کی ملاقات ایک پین کیک سواپ نامی کردارسےہوتی ہے ۔ بعدازیں دونوں گہرے دوست بن جاتے ہیں ۔دونوں دوست ہندوستان او ر جاپان کا دورہ کرتے ہیں۔ ان ممالک کےماحولیات اور پکوان پر ریسرچ کرتے ہیں۔

وہ دونوں یہاں کے پکوان خود پکاتے اور کھاتے ہیں۔ آخر میں لبوبو اپنی انتھک محنت سے شیف بننےکی خواہش پوری کرلیتا ہے اور اپنے بنائے ہوئے کیک پر لگی ہوئی ایک خاص ٹوپی بطور انعام حاصل کرتا ہے۔کہانی دوستی ،محنت ، مدد اور کامیابی کا پیغام دیتی ہے۔ ‘‘یہ کتاب امیزون پر کنڈل اور پیپر بیک دونوں شکلوں میں دستیاب ہے اور اس کا باقاعدہ بین الاقوامی آئی ایس بی این نمبر (۸۱۶۳۷۴۳۳۶۰۔۹۷۹) بھی موجود ہے۔ کتاب کالنک :www.amazon.in/dp/B0HNVMMN7Z

والدین کے تاثرات: جوگیشوری (مشرق) باندرہ پلاٹ میں رہائش پزیر ۷؍سالہ میران اور ۹؍سالہ نظیفہ قمررضوانی مدنی اُردوہائی اسکول میں دوسری اور تیسری جماعت میں زیرتعلیم ہیں۔ دونوں بھائی بہن پڑھائی میں ذہین ہیں۔ ان کی تعلیم وتربیت میں والدین کااہم کردار ہے۔ والدین نے شروع سے انگریزی اور اُردو کتابوںکے درمیان ان کی پرورش کی جس کانتیجہ ہے کہ عمران اور نظیفہ روانی سے انگریزی اور اُردو کتابیں پڑھ لیتےہیں۔ دونوں ہی بھائی بہن نے مختلف تعلیمی سرگرمیوں میںمنفرد کارکردگی کا مظاہرہ کیا ہے۔ واضح رہے کہ ان دونوںبھائی بہن نے ابتدائی ۲؍سال کولکاتا کے ایک کانوینٹ اسکول میں پڑھائی کی تھی۔ دونوں کےوالدقمر رضوانی اور والدہ رضوانہ بانو کے مطابق ’’ہم نے اپنےدونوں بچوں کو بچپن سے کتابیں پڑھنے کی ترغیب دی۔ انگریزی پڑھنےکی صلاحیت میں اضافہ کیلئے خان اکیڈمی کے کڈس پروگرام سے بھی مدد حاصل کی۔ اسکول کے علاوہ گھر پر ان کی پڑھائی پربھرپور توجہ دی۔

میران اور نظیفہ نے نرسری اور کے جی کی پڑھائی کولکاتا  کے ایک کانوینٹ اسکول سے کی اس لئے دونو ں بچوں نے چھوٹی عمر میں ہی انگریزی پڑھنا شروع کر دیا تھا۔ جس کی وجہ سے نظیفہ کوانگریزی میں کتاب لکھنےمیں بڑی مددملی ہے۔