متحدہ عرب امارات میں ۲۰۲۵ء کی پہلی ششماہی میں ۳؍ ہزار ۶۰۰؍سے زائد افراد نے اسلام قبول کیا جبکہ سیکڑوں دیگر افراد نے اسلامی تعلیمی پروگراموں اور انٹرایکٹیو اقدامات میں حصہ لیا

 ۲۰۲۵ءکی پہلی ششماہی میں ۳؍ ہزار ۶۰۰؍سے زائد افراد نے اسلام قبول کیا، جبکہ سیکڑوں دیگر افراد نے اسلامی تعلیمی پروگراموں اور انٹرایکٹو اقدامات میں حصہ لیا جو شہر کی ثقافتی رسائی کی کوششوں کے بڑھتے ہوئے اثرات کو ظاہر کرتا ہے۔ 
پہلی ششماہی ۲۰۲۵ءمیں نمایاں تبدیلیاں اور شرکت
اسلامی امور اور امدادی سرگرمیوں کے محکمے (IACAD) کے تحت محمد بن راشد مرکز برائے اسلامی ثقافت نے جنوری سے جون ۲۰۲۵ءکے دوران اسلام قبول کرنے والوں کی تعداد میں نمایاں اضافہ ریکارڈ کیا۔ اس مدت میں مجموعی طور پر ۳؍ ہزار ۶۰۰؍سے زائد افراد نے اسلام قبول کیا۔ تبدیلی مذہب کے علاوہ، مرکز نے اپنے تعلیمی پروگراموں میں ایک ہزار ۳۰۰؍ سے زائد طلباء کی شمولیت ریکارڈ کی جن کا مقصد اسلامی اصولوں اور عبادات پر منظم رہنمائی فراہم کرنا ہے۔ مزید برآں، مرکز نے۴۷؍ علمی و آگاہی کورسز منعقد کئے جن سےایک ہزار ۴۰۰؍ سے زائد افراد نے استفادہ کیا۔ یہ سیشنز IACAD کی اسلامی ثقافت کو فروغ دینے اور خطے میں دینی شعور بڑھانے کی بنیادی کوششوں کا حصہ ہیں۔ ایک اور اہم منصوبہ ’’پائیدار علم کا کمرہ‘‘ ہے جس سے۱۹۰؍ سے زائد افراد نے فائدہ اٹھایا۔ یہ تعلیمی جگہ جدید ٹیکنالوجی اور انٹرایکٹو طریقوں کے ذریعے سیکھنے کے عمل کو مزید مؤثر بنانے کیلئے تیار کی گئی ہے۔ 
مرکز کے ڈائریکٹر، جاسم الخزعری نے ادارے کے وسیع مشن کو اجاگر کرتے ہوئے کہا: ’’ہم ایک جامع وژن کے تحت کام کر رہے ہیں، جس کا مقصد ثقافتی اور مذہبی مکالمے کے پل تعمیر کرنا ہے، اور اسلام کی ایک روشن تصویر پیش کرنا ہے جو رواداری، علم اور مکالمے پر مبنی ہو، اور نئے مسلمان ہونے والوں اور اسلامی ثقافت میں دلچسپی رکھنے والوں دونوں کی ضروریات پوری کرے۔ ‘‘