مرکزی کابینہ نے کھیلو انڈیا اسکیم کو نئے انداز میں نافذ کرنے اور قومی کھیل فیڈریشنز(این ایس ایف) کے لیے مالی سال ۲۷۔۲۰۲۶ء سے ۳۱۔۲۰۳۰ء تک مجموعی طور پر۳۶۴۴۱؍ کروڑ روپے کے مشترکہ بجٹ کی منظوری دے دی۔

مرکزی کابینہ نے جمعہ کو کھیلو انڈیا اسکیم کو نئے انداز میں نافذ کرنے اور قومی کھیل فیڈریشنز(این ایس ایف) کے لیے مالی سال ۲۷۔۲۰۲۶ء سے ۳۱۔۲۰۳۰ء تک مجموعی طور پر۳۶۴۴۱؍  کروڑ روپے کے مشترکہ بجٹ کی منظوری دے دی۔  یہ آزادی کے بعد ملک کا سب سے بڑا کھیلوں کی ترقی کا پروگرام قرار دیا جا رہا ہے۔ منظور شدہ بجٹ سابقہ کھیلو انڈیا اسکیم کے مقابلے میں تقریباً آٹھ گنا زیادہ ہے، جو نوجوانوں کی ترقی، کھیلوں کے فروغ اور بھارت کو عالمی کھیلوں کی طاقت بنانے کے حکومت کے عزم کی عکاسی کرتا ہے۔  اس نئی اسکیم کا مقصد ہر باصلاحیت ہندوستانی نوجوان کے لیے اسکول اور دیہی کھیل کے میدانوں سے لے کر اولمپک کے پوڈیم تک رسائی کا ایک مربوط اور آسان راستہ فراہم کرنا ہے، تاکہ کسی بھی باصلاحیت کھلاڑی کو مقام، معاشی حالات یا مواقع کی کمی کی وجہ سے نظر انداز نہ کیا جائے۔ 

یہ بھی پڑھئے:’’لکی بھاسکر ۲‘‘ کی تیاری شروع، ذوالقر سلمان کی بلاک بسٹر فلم کا سیکوئل بنے گا

 کھیلو انڈیا پالیسی ۲۰۲۵ء اور قومی تعلیمی پالیسی ۲۰۲۰ء کے وژن کے مطابق یہ اسکیم کھیلوں کو تعلیم، جسمانی فٹنیس، ٹیکنالوجی اور اعلیٰ معیار کی تربیت سے جوڑتی ہے، ساتھ ہی ہندوستان کے طویل مدتی کھیلوں کے اہداف، جن میں ۲۰۳۰ء کامن ویلتھ گیمز اور مستقبل میں اولمپک اور پیرالمپک کھیلوں کی میزبانی کی کوششیں بھی شامل ہیں، کے لیے مضبوط بنیاد فراہم کرتی ہے۔  اس اسکیم میں نیشنل سینٹرز آف ایکسیلینس، کھیلو انڈیا سینٹرز آف ایکسیلینس، سائی ٹریننگ سینٹرز، کھیلو انڈیا سے منظور شدہ اکیڈمیاں، کھیلو انڈیا سینٹرز اور مسلح افواج کی یوتھ اسپورٹس کمپنیاں شامل ہوں گی۔ یہ تمام ادارے مل کر ملک بھر میں عالمی معیار کی کوچنگ، اسپورٹس سائنس کی سہولتیں اور جدید بنیادی ڈھانچہ فراہم کریں گے۔

یہ بھی پڑھئے:فیفا کا نجی سرمایہ کاری منصوبے پر مشاورت جاری رکھنے کا اعلان، مخالفت برقرار

اس مقصد کے لیے ٹیلنٹ آئیڈینٹیفکیشن اینڈ ڈیولپمنٹ کمیٹیاں، زونل کمیٹیاں، ٹیلنٹ اسکاؤٹس، ہائی پرفارمنس ڈائریکٹرز اور ہائی پرفارمنس مینیجرز پر مشتمل ملک گیر نظام قائم کیا جائے گا، جو باصلاحیت کھلاڑیوں کی مسلسل شناخت، نگرانی اور ترقی کو یقینی بنائے گا۔  اس اسکیم کے تحت مقابلوں کی تعداد میں اضافہ کیا جائے گا، جس سے کھلاڑیوں کو زیادہ مواقع میسر آئیں گے۔ خواتین کھلاڑیوں، پیرا ایتھلیٹس، دیسی کھیلوں اور کھیلوں کو امن، سماجی ہم آہنگی اور کمیونٹی کی ترقی کے مؤثر ذریعہ کے طور پر فروغ دینے پر خصوصی توجہ دی گئی ہے۔ یہ اسکیم قومی کھیلوں کے انعقاد اور بڑی بین الاقوامی کھیلوں کی میزبانی کے لیے بھی مالی اور انتظامی تعاون فراہم کرے گی۔