نیویارک ٹائمز اور سینا کالج کے پول میں رائے دہندگان نے کملا ہیرس کے حق میں اپنی رائے دی اور ٹرمپ پر ان کے مقابلے میں کم اعتماد کا اظہار کیا۔

خبرایجنسی ’اے ایف پی‘ کی رپورٹ کے مطابق گزشتہ روز کے سروے کے نئے نتائج کے مطابق کملا ہیرس کو ڈونالڈ ٹرمپ پر ۳؍ اہم ریاستوں میں برتری حاصل ہوگئی ہے اور سابق صدر کو گزشتہ ایک برس سے حاصل برتری ختم ہوگئی ہے۔ نیویارک ٹائمز اور سینا کالج کے پول میں رائے دہندگان نے کملا ہیرس کے حق میں اپنی رائے دی اور ٹرمپ پر ان کے مقابلے میں کم اعتماد کا اظہار کیا۔ مشی گن، پنسلوانیا اور وسکونسن میں پول کے نتائج کے مطابق ۵۰؍ فیصد رائے دہندگان نے کملا ہیرس کے حق میں رائے دی اور ٹرمپ کو ۴۶؍ فیصد کی حمایت حاصل رہی۔ 
امریکی الیکٹورل کالج کے تحت ووٹنگ نظام میں تینوں گنجان آبادوالی ریاستوں کو کسی بھی پارٹی کی جیت کیلئے بنیادی حیثیت دی جاتی ہے۔ رپورٹ کے مطابق مذکورہ ریاستوں کے نئے نتائج گزشتہ ایک برس کے دوران سامنے آنے والے نتائج کے برعکس ہیں کیونکہ اس سے قبل ڈونالڈ ٹرمپ کامقابلہ ڈیموکریٹک صدر جوبائیڈن سے برابر ہوتا تھا یا معمولی برتری حاصل ہوتی تھی۔ تاہم گزشتہ ماہ بائیڈن کی دستبرداری کے بعد کملاہیرس کی توثیق کے نتیجے میں ووٹنگ کا نتیجہ مختلف نظر آرہا ہے۔ 
واضح رہے کہ امریکی صدارتی انتخاب۵؍نومبر کو ہوگا اور اس سے ۳؍ ماہ قبل ہونے والے پولز میں پوچھے گئے سوالات میں ٹرمپ کو معیشت اور امیگریشن جیسے کلیدی شعبوں میں عوامی حمایت حاصل ہے۔ تاہم کملا ہیرس کو ۲۴؍نکات پر برتری حاصل ہے جس میں اسقاط حمل کا مسئلہ بھی شامل ہے۔