وینزویلا نے امریکہ کو انتباہ دیا کہ’’ہمارےپاس طیارہ شکن میزائل ہیں۔‘‘

وینزویلا کے صدر نکولس مادورو نے کہا ہے کہ’’ کیریبین میں تعینات امریکی افواج کے مقابلے کے لئے ہمارے پاس۵؍ہزار روسی ساختہ زمین سے فضا میں مار کرنے والے اور قابلِ منتقلی میزائل موجود ہیں۔‘‘ بدھ کے روز، اعلیٰ فوجی حکام کی شرکت سے منعقدہ  ،ایک ٹیلیویژن تقریب سے خطاب میں مادورو نے کہا ہے کہ وینزویلا کے پاس، روسی ساختہ اور مختصر  فاصلے تک مار کرنے والے،ایگل۔ایس میزائل موجود ہیں۔ یہ میزائل ملک کے فضائی دفاعی نظام کا اہم حصہ ہیں۔  انہوں نے کہا ہے کہ ’’ان میزائلوں کی تعداد کم از کم۵؍ہزار ہے اور امن کو یقینی بنانے اور قومی خودمختاری کے تحفظ کی خاطر اہم فضائی دفاعی مقامات پر متعین کئے گئے ہیں ۔‘‘امریکہ ایک طویل عرصے سے بائیں بازو کے لیڈر مادورو کی حکومت کی مخالفت کرتا چلا آ رہا ہے۔ ٹرمپ انتظامیہ نے وینزویلا کے ساحل کے قریب ایک چھوٹا بحری بیڑہ متعین کر رکھا ہے جسے واشنگٹن، منشیات کے خلاف، آپریشن کا حصہ قرار دیتا ہے۔  وینزویلا سے امریکہ کی طرف منشیات کی اسمگلنگ کے دعوے کے ساتھ امریکی لڑاکا طیاروں نے کئی تیز رفتار کشتیوں کو تباہ کر دیا ہے۔ وینزویلا کے حکام نے امریکی کارروائیوں کو ملکی خودمختاری کی خلاف ورزی قرار دیا  اور واشنگٹن کو ،منشیات مشن کو بہانہ بنا کر ،وینزویلا کے خلاف جارحیت کا قصوروار ٹھہرایا ہے۔  مادورو نے کہا ہے کہ یہ ہتھیار ملک کو ’’کسی بھی سامراجی خطرے‘‘ کا جواب دینے کیلئے تیار رکھیں گے۔