’’تھری ایڈیٹس‘‘کے سیکوئل میں عامر خان کے ساتھ وکی کوشل بھی نظر آ سکتے ہیں۔ انہیں فلم کی کہانی کافی پسند آئی ہے اور وہ اس فلم میں کام کرنے کے لیے پرجوش ہیں۔ جانیے کہ اس فلم میں ان کا کردار کیسا ہوگا۔

 ۲۰۰۹ء میں ریلیز ہونے والی راجکمار ہیرانی کی ہدایت کاری میں بنی فلم ’’تھری ایڈیٹس‘‘ کو لوگوں نے بہت پسند کیا تھا۔ عامر خان، آر مادھون اور شرمن جوشی کی تینوں کی جوڑی نے ناظرین پر خوب جادو چلایا تھا۔ اب اس فلم کے سیکوئل کی چرچا شروع ہو گئی ہے۔ کچھ دن پہلے عامر خان نے تصدیق کی تھی کہ راجکمار ہیرانی اس وقت ’’تھری ایڈیٹس‘‘ پر کام کر رہے ہیں۔ عامر نے یہ بھی کہا تھا کہ انہوں نے کہانی سنی ہے اور کہانی کافی اچھی ہے۔ اب نئی خبر یہ ہے کہ عامر کے ساتھ وکی کوشل بھی سیکوئل میں نظر آ سکتے ہیں۔
پنک ولا کی ایک رپورٹ کے مطابق اس فلم سے جڑنے کے لیے وکی کوشل کی میکرز کے ساتھ بات چیت جاری ہے۔ وکی، عامر اور ہیرانی کے درمیان کئی بار میٹنگ ہو چکی ہے۔ وکی نے زبانی طور پر اس فلم کا حصہ بننے کے لیے ہامی بھر دی ہے۔ رپورٹ میں یہ بھی کہا گیا ہے کہ وکی ایک نئے اور اہم کردار میں اس فلم کا حصہ بنیں گے۔ وہ عامر، شرمن جوشی اور آر مادھون کے ساتھ ’چوتھے ایڈیٹ‘ کے طور پر فلم میں شامل ہوں گے۔
رائٹنگ اسٹیج میں ’’تھری ایڈیٹس‘‘ کا سیکوئل
وکی کوشل پہلے بھی راجکمار ہیرانی کے ساتھ ’’سنجو‘‘ اور’’ ڈنکی‘‘ جیسی فلموں میں کام کر چکے ہیں۔ اب وہ’’تھری ایڈیٹس‘‘  کے سیکوئل میں عامر خان کے ساتھ اسکرین شیئر کرنے اور اس بڑی فرنچائز کا حصہ بننے کے لیے پرجوش ہیں۔ فی الحال یہ فلم رائٹنگ اسٹیج میں ہے۔ ابھیجیت جوشی کے ساتھ مل کر راجکمار ہیرانی اسکرین پلے پر کام کر رہے ہیں۔

یہ بھی پڑھئے:پری میٹ گالا تقریب میں ایشا امبانی کا لباس توجہ کا مرکز، ۲۶؍ ریاستوں کی نمائندگی

کب شروع ہو سکتی ہے شوٹنگ؟
رپورٹ میں یہ بھی کہا گیا ہے کہ سال۲۰۲۷ء کے دوسرے نصف میں ’’تھری ایڈیٹس‘‘ کے سیکوئل کی شوٹنگ شروع ہو سکتی ہے۔ تاہم، اس فلم پر کام شروع کرنے سے پہلے وکی کوشل میڈاک فلمز کے بینر تلے بننے والی فلم’’مہاوتار‘‘ کی شوٹنگ مکمل کرنا چاہتے ہیں۔ کچھ عرصہ پہلے ایک رپورٹ میں بتایا گیا تھا کہ وکی جلد ہی ہدایت کار سنجے لیلا بھنسالی کی فلم ’’لو اینڈ وار‘‘ کی شوٹنگ شروع کریں گے۔ جون تک اس فلم کا کام مکمل کرنے کے بعد وہ ’’مہاوتار‘‘ کی تیاری میں لگ جائیں گے۔

یہ بھی پڑھئے:شمالی کوریا کے کھلاڑی ۱۲؍ سال بعد پہلی بار جنوبی کوریا میں مقابلہ کریں گے

یہ بھی کہا گیا تھا کہ وہ پہلے ۶؍ مہینے فلم کے لیے خود کو تیار کریں گے، اس کے بعد جنوری ۲۰۲۷ء میں شوٹنگ شروع ہوگی، جو تقریباً ایک سال تک جاری رہنے کی امید ہے۔ اسی دوران اب ’’تھری ایڈیٹس‘‘ سے بھی وکی کا نام جڑ رہا ہے۔ اب دیکھنا ہوگا کہ آگے اس فلم کے بارے میں کیا نئی معلومات سامنے آتی ہیں اور کب تک اس پروجیکٹ کے لیے وکی کی ڈیل فائنل ہوتی ہے۔