ٹیم انڈیا کے بلے باز کوہلی کا شمار دنیا کے مہنگے ترین کھلاڑیوں میں ہوتا ہے۔کوہلی کی کمائی کا بڑا حصہ برانڈ اینڈورسمنٹس سے آتا ہے۔ سوشل میڈیا سے بھی اچھی آمدنی۔

ہندوستانی کرکٹ ٹیم کے اسٹار بلے باز وراٹ کوہلی نے ٹیسٹ کرکٹ سے ریٹائرمنٹ کا اعلان کر دیا ہے۔۲۰۱۱ء میں ٹیسٹ  میں آغاز کرنے والے کوہلی نے گزشتہ برسوں میں خود کو کرکٹ میں ایک بڑے برانڈکی شکل میں قائم کیا ہے۔ یہی وجہ ہے کہ ان کے برانڈ کی توثیق اور سرمایہ کاری کی فہرست بہت طویل ہے۔ کوہلی کا شمار دنیا کے مہنگے ترین کھلاڑیوں میں ہوتا ہے۔ میڈیا رپورٹس کے مطابق کوہلی کی کمائی کا بڑا حصہ برانڈ اینڈورسمنٹس سے آتا ہے۔
  کرکٹ سے آمدنی 
 کرکٹ سے کوہلی کی کمائی حیرت انگیز ہے۔ بی سی سی آئی کے ساتھ ان کا سالانہ معاہدہ۷؍کروڑ روپے (تقریباً۸ء۵؍لاکھ ڈالرس) کا ہے۔ رپورٹ کے مطابق ان کی آئی پی ایل فرنچائزی  انہیں ہر سیزن میں۱۵؍ کروڑ روپے دیتی ہے۔
  سوشل میڈیا اور توثیق سے بڑی رقم کمائیں 
 کوہلی کی سوشل میڈیا پر مقبولیت بھی بہت زیادہ ہے۔ ہوپر ایچ کیو کی رپورٹ کے مطابق  وہ انسٹاگرام پر ایک پوسٹ کیلئے۱۱ء۴۵؍ کروڑ روپے تک چارج کرتے ہیں۔ انہیں بڑے برانڈس جیسے پیوما، ہیرو موٹو کارپ ، ایم آر ایف ، آؤڈی اور فلپکارٹ  سے توثیق ملتی ہے۔ فوربس کے مطابق کوہلی برانڈس کی توثیق کے ذریعے ہر سال۲۰؍ ملین  ڈالرس (تقریباً۱۵۰؍ کروڑ روپے) کماتے ہیں۔ کوہلی کی سوشل میڈیا پر مقبولیت اور برانڈس سے ان کی کمائی ان کی کل آمدنی کا اہم حصہ بن گئی ہے۔
  کاروبار اور سرمایہ کاری
 کوہلی نے کرکٹ کے علاوہ دیگر کئی شعبوں میں سرمایہ کاری کی ہے۔ میڈیا رپورٹس کے مطابق انہوں نے بلیو ٹرائب، ریج کافی، ہائپرائس، چیزل فٹنیس اور ڈجٹ انشورنس جیسی کمپنیوں میں حصہ لیا ہے۔ اس کے علاوہ ان کی رونگ اور ایف سی گوا   جیسی کمپنیوں میں بھی شراکت ہے۔ وہ اسپورٹس کانوو اور ٹیم بلیو رائزنگ جیسی کمپنیوں میں بھی سرمایہ کار ہیں۔
  کوہلی کی  ریئل اسٹیٹ میں بھی بڑی شناخت ہے
 کوہلی کے پاس لگژری  ریئل اسٹیٹ کا ایک اہم پورٹ فولیو بھی ہے۔ ہندوستان ٹائمز کی ایک رپورٹ کے مطابق وہ ممبئی میں ایک پرتعیش حویلی کے مالک ہیں جس کی مالیت۲۰؍ کروڑ روپے ہے۔   اس کے علاوہ گروگرام میں ان کا ایک بنگلہ بھی ہے جس کی قیمت۸۰؍ کروڑ روپے ہے۔ ۲۰۲۲ء میں انہوں نے اور ان کی اہلیہ، بالی ووڈ اداکارہ انوشکا شرما نے بھی علی باغ میں۱۹ء۲۴؍ کروڑ روپے میں ایک فارم ہاؤس خریدا ہے۔
  مہنگی کاروں کا حیرت انگیز مجموعہ 
 کوہلی کا طرز زندگی بھی بہت پرتعیش ہے۔ میڈیا رپورٹس کے مطابق ان کے پاس کچھ بہت مہنگی اور لگژری کاریں ہیں جن میں لمبورگینی ہیوراکین، آؤڈی اے ۸؍ ایل، بینٹلی کانٹی نینٹل جی ٹی اور بینٹلی فلائنگ اسپر جیسی کاریں شامل ہیں۔