مغربی بنگال حکومت نے سرکاری اور امدادی اسکولوں میں طلبہ کے اسکول بیگ کے وزن کے لیے نئی ہدایات جاری کرتے ہوئے کہا ہے کہ بیگ کا وزن بچے کے جسمانی وزن کے ۱۰؍ فیصد فیصد سے زیادہ نہیں ہونا چاہیے۔ مغربی بنگال کے محکمہ تعلیم کی جانب سے جاری پالیسی کے تحت پری پرائمری بچوں کے لیے ’’نو بیگ‘‘ اصول نافذ کیا گیا ہے، جبکہ مختلف جماعتوں کے لیے بیگ کے وزن اور ہوم ورک کی واضح حد مقرر کی گئی ہے۔

مغربی بنگال حکومت نے اسکول جانے والے بچوں کے بڑھتے ہوئے جسمانی دباؤ کو کم کرنے کے لیے نئی تعلیمی ہدایات جاری کرتے ہوئے سرکاری اور امدادی اسکولوں میں اسکول بیگ کے وزن کی حد مقرر کر دی۔ ریاستی محکمہ تعلیم کی جانب سے جاری کردہ حکم نامے میں کہا گیا ہے کہ کسی بھی طالب علم کے اسکول بیگ کا وزن ’’بچے کے جسمانی وزن کے ۱۰؍ فیصد سے زیادہ نہیں ہونا چاہیے۔‘‘ محکمہ تعلیم نے اس سلسلے میں ایک تفصیلی چارٹ بھی جاری کیا ہے، جس میں مختلف جماعتوں کے طلبہ کے اوسط جسمانی وزن کے مطابق اسکول بیگ کا مثالی وزن درج کیا گیا ہے۔

یہ بھی پڑھئے : ناقابل یقین واقعہ، شیر کے حملے میں ایک ساتھ ۴؍ خواتین کی موت

سرکاری ہدایات کے مطابق، پری پرائمری سطح کے بچوں، جن کا اوسط جسمانی وزن ۱۰؍ سے ۱۶؍ کلوگرام کے درمیان ہوتا ہے، کے لیے ’’نو بیگ پالیسی‘‘ نافذ کی گئی ہے، یعنی ان بچوں کو اسکول بیگ لانے کی ضرورت نہیں ہوگی۔ کلاس اول اور دوم کے طلبہ، جن کا جسمانی وزن عموماً ۱۶؍ سے ۲۲؍ کلوگرام کے درمیان ہوتا ہے، ان کے بیگ کا وزن ۶ء۱؍ کلوگرام سے ۲ء۲؍ کلوگرام تک محدود رکھا گیا ہے۔ اسی طرح، کلاس نہم اور دہم کے طلبہ کے لیے اسکول بیگ کا وزن ۵ء۲؍ کلوگرام سے ۵ء۴؍ کلوگرام کے درمیان مقرر کیا گیا ہے، جبکہ کلاس گیارہویں اور بارہویں کے طلبہ کے لیے یہ حد ۵ء۳؍ کلوگرام سے ۵؍ کلوگرام تک رکھی گئی ہے۔
محکمہ تعلیم نے اپنے حکم نامے میں واضح کیا کہ بھاری اسکول بیگ بچوں میں کمر درد، گردن اور کندھوں کے پٹھوں میں تناؤ کا سبب بنتے ہیں، جس کے باعث ان کی جسمانی صحت متاثر ہو سکتی ہے۔ ہدایات میں کہا گیا ہے کہ ’’بھاری اسکول بیگ بچوں کی گردن، کندھے اور کمر کے عضلات پر دباؤ ڈالتے ہیں۔ مختلف بین الاقوامی اداروں نے وقتاً فوقتاً جسمانی وزن کے تناسب سے اسکول بیگ کے وزن کی سفارشات جاری کی ہیں۔‘‘ محکمہ تعلیم کے ایک سینئر اہلکار کے مطابق وزارت تعلیم نے اس مسئلے پر ایک ماہر کمیٹی تشکیل دی تھی، اور مغربی بنگال کی نئی پالیسی انہی سفارشات کی بنیاد پر تیار کی گئی ہے۔

یہ بھی پڑھئے : کاکروچ جنتا پارٹی کی ویب سائٹ بند، انسٹاگرام اکاؤنٹ ہیک؛ پنجاب پولیس کا مشتبہ لنکس کے خلاف انتباہ

اس سے قبل جنوری ۲۰۱۹ء میں ممتا بنرجی حکومت نے بھاری بیگز کے مسئلے کو کم کرنے کے لیے ایک الگ پالیسی متعارف کرائی تھی، جس کے تحت ۱۲۲؍ سرکاری امدادی اداروں میں نرسری سے آٹھویں جماعت تک کے طلبہ کے لیے لاکرز فراہم کیے گئے تھے۔ محکمہ تعلیم کے ایک اہلکار نے بتایا کہ اب طلبہ اپنی نصابی اور ورزش کی کتابیں اسکول کے لاکرز میں چھوڑ سکتے ہیں، جس کی وجہ سے انہیں روزانہ تمام کتابیں گھر سے اسکول اور اسکول سے گھر لے جانے کی ضرورت نہیں پڑتی۔ انہوں نے کہا کہ ’’اگر بچوں کو ہر روز تمام کتابیں ساتھ لے جانے کی ضرورت نہ ہو تو ان کے بیگ نمایاں طور پر ہلکے ہو جاتے ہیں۔‘‘
مغربی بنگال ہیڈ ماسٹرز اسوسی ایشن کے صدر کرشناگشو مشرا نے نئی پالیسی کا خیر مقدم کرتے ہوئے کہا کہ یہ زیادہ جامع اور مؤثر اقدام ہے، جس سے طلبہ کے جسمانی بوجھ میں کمی کی امید کی جا رہی ہے۔ حکومت نے ہوم ورک کے حوالے سے بھی نئی حدود مقرر کی ہیں۔ ہدایات کے مطابق، کلاس اول اور دوم کے طلبہ کو کوئی ہوم ورک نہیں دیا جائے گا۔ کلاس سوم تا پنجم کے طلبہ کے لیے ہفتہ وار ہوم ورک کی حد دو گھنٹے مقرر کی گئی ہے، جبکہ کلاس ششم تا ہشتم کے طلبہ کو روزانہ ایک گھنٹے سے زیادہ ہوم ورک نہیں دیا جا سکے گا۔
اسی طرح، کلاس نہم تا بارہویں کے طلبہ کے لیے روزانہ دو گھنٹے کی ہوم ورک حد مقرر کی گئی ہے۔ تعلیمی ماہرین کا کہنا ہے کہ نئی پالیسی بچوں کی ذہنی اور جسمانی صحت کے تحفظ کے ساتھ ساتھ متوازن تعلیمی ماحول قائم کرنے کی سمت ایک اہم قدم ثابت ہو سکتی ہے۔