ہندوستان کے موجودہ چیف جسٹس آف انڈیا (سی جے آئی) بی آر گوئی کے بعد ملک کا اگلا چیف جسٹس کون ہوگا؟ اس  تقرری کی کارروائی مرکزی حکومت نے باقاعدہ طور پر شروع کر دی ہے۔  واضح رہے کہ سی جے آئی گوَئی آئندہ ماہ ۲۳؍نومبر کو اپنے عہدے سے  سبکدوش ہو جائیں گے ۔ان کی سبکدوشی سے قبل ملک کے نئے چیف جسٹس کی تقرری ہو جانی چاہئے کیوں کہ یہ آئینی طور پر ناگزیر ہے۔ اسی لئے مرکزی حکومت یہ کارروائی باقاعدہ طور پر شروع کردی ہے۔ عدالتی نظام کے ماہرین اور باوثوق ذرائع کا کہنا ہے کہ جسٹس سوریہ کانت اگلے سی جے آئی  بننے کی ریس میں سب سے آگے ہیں۔ ان کا چیف جسٹس آف انڈیا بننا تقریباً طے مانا جا رہا ہے۔

سپریم کورٹ اور ہائی کورٹ کے ججوں کی تقرری کے عمل سے واقف افراد نے نیوز ایجنسی ’پی ٹی آئی‘ کو بتایا کہ سی جے آئی گوئی کو ان کے جانشین کا نام بتانے والا خط جمعرات کی شام یا جمعہ کو بھیج دیا گیا ہے۔ میمورنڈم آف پروسیزر کے مطابق جو سپریم کورٹ اور ہائی کورٹ کے ججوں کی تقرری، ٹرانسفر اور ترقی کو گائیڈ کرنے والے ڈاکیومنٹس کا ایک سیٹ ہے، اس میں کہا گیا ہے کہ ہندوستان کے چیف جسٹس کے عہدہ پر تقرری سپریم کورٹ کے سب سے سینئر جج کی ہونی چا ہئے جنہیں عہدہ سنبھالنے کیلئے موزوں تصور کیا جائے۔

واضح رہے کہ مرکزی وزیر قانون مناسب وقت پر ہندوستان کے موجودہ چیف جسٹس سے اگلے سی جے آئی کی تقرری کے  لئے سفارش طلب کریں گے۔ عام طور پر یہ لیٹر موجودہ سی جے آئی کے ۶۵؍ سال کی عمر میں ریٹائر ہونے سے ایک ماہ پہلے بھیجا جاتا ہے۔ جسٹس سوریہ کانت سی جے آئی گوئی کے بعدسپریم کورٹ میں سب سے سینئر جج ہیں اور ان کے اگلے سی جے آئی بننے کا سب سے زیادہ امکان ہے۔