اوپن اے آئی نے اپنی نئی مہم پاؤز، پلے ، پرامپٹ کے تحت ۷۰؍ ڈالر (تقریباً ۶۷۰۰؍ روپے) قیمت کی چیٹ جی پی ٹی برانڈیڈ باسکٹ بال فروخت کے لیے پیش کی ہے۔ اس اقدام کو کمپنی کی صارفین کے لیے ہارڈویئر اور برانڈیڈ مصنوعات کے شعبے میں توسیع کی ایک نئی کوشش کے طور پر دیکھا جا رہا ہے۔

اوپن اے آئی نے حال ہی میں ڈیولپرز کے لیے چیٹ جی پی ٹی کوڈیکس کا خصوصی کی بورڈ متعارف کرایا تھا، اور اب کمپنی نے اپنی آن لائن اسٹور پر سبز رنگ کی باسکٹ بال بھی فروخت کے لیے پیش کر دی ہے، جس پر چیٹ جی پی ٹی کا لوگو نمایاں ہے۔ دلچسپ بات یہ ہے کہ یہ باسکٹ بال لانچ ہوتے ہی آؤٹ آف اسٹاک ہو گئی جبکہ کوڈیکس کریئیٹر مائیکرو کی بورڈ بھی فروخت ہو چکا ہے۔

یہ بھی پڑھئے:تیسری زبان کا آغاز چھٹی جماعت سے ہی کریں: سپریم کورٹ

یہ  سائز ۷؍ کی مکمل ربڑ سے تیار کردہ باسکٹ بال ہے، جسے عام کھیل کے لیے استعمال کیا جا سکتا ہے۔ اس میں کوئی اسمارٹ فیچر، سینسر، بلیوٹوتھ یا مصنوعی ذہانت سے متعلق ٹیکنالوجی شامل نہیں، بلکہ اس کی خاص پہچان صرف چیٹ جی پی ٹی کی برانڈنگ ہے۔
Pause. Play. Prompt مہم کیا ہے؟
اوپن اے آئی کے مطابق یہ باسکٹ بال نئی مہم ’’Pause. Play. Prompt‘‘ کی نمایاں پروڈکٹ ہے، جس کا مقصد لوگوں کو یہ یاد دلانا ہے کہ تخلیقی صلاحیت صرف اسکرین تک محدود نہیں بلکہ حقیقی دنیا میں کھیل کود اور سرگرمیوں سے بھی پروان چڑھتی ہے۔کمپنی نے اگرچہ اس مہم کی مزید تفصیلات جاری نہیں کیں، تاہم خیال کیا جا رہا ہے کہ یہ صارفین، خصوصاً ڈیولپرز، کو اسکرین سے کچھ دیر دور رہ کر جسمانی سرگرمیوں کی ترغیب دینے کی کوشش ہے۔
 قیمت پر سوالات
۷۰؍ڈالر کی اس باسکٹ بال کی قیمت نے بھی توجہ حاصل کی ہے کیونکہ عام معیار کی باسکٹ بال ہندوستان میں ایک ہزار روپے سے بھی کم میں دستیاب ہوتی ہے، جبکہ اعلیٰ معیار کی کئی باسکٹ بال بھی اس قیمت سے کہیں سستی ہیں۔ ماہرین کا کہنا ہے کہ خریدار دراصل باسکٹ بال کے بجائے  چیٹ جی پی ٹی برانڈ  کی قیمت ادا کر رہے ہیں۔

یہ بھی پڑھئے:پربھاس کی فلم ’’فوجی ‘‘ دسمبر ۲۰۲۶ء میں ریلیز ہوگی، نیا پوسٹر جاری

اوپن اے آئی کی ہارڈویئر حکمتِ عملی
 یہ باسکٹ بال اوپن اے آئی کی صارفین کے لیے مصنوعات کی بڑھتی ہوئی فہرست کا حصہ ہے۔ اس سے قبل کمپنی نے ۲۳۰؍ ڈالرس قیمت والا Codex Micro Keyboard  متعارف کروایا تھا، جو مصنوعی ذہانت کے ایجنٹس کے ساتھ کام کرنے والے ڈیولپرز کے لیے خصوصی طور پر تیار کیا گیا ہے اور وہ بھی لانچ کے فوراً بعد فروخت ہو گیا تھا۔ کمپنی کی  Supply Co  کلیکشن میں ملبوسات اور لائف اسٹائل مصنوعات بھی شامل ہیں، جن کے ذریعے اوپن اے آئی اپنی برانڈ شناخت کو صرف سافٹ ویئر تک محدود رکھنے کے بجائے ایک وسیع صارفین کی ٹیکنالوجی برانڈ میں تبدیل کرنا چاہتی ہے۔