ہالی ووڈ کے معروف ہدایت کار مائیکل مان کی طویل انتظار کی جانے والی فلم ’’ہیٹ ۲‘‘ ایک بار پھر خبروں میں ہے۔ تازہ رپورٹس کے مطابق لیونارڈو ڈی کیپریو اور کرسچن بیل کو فلم کے مرکزی کرداروں کے لیے منتخب کر لیا گیا ہے، تاہم اسٹوڈیو نے تاحال ان معاہدوں کی باضابطہ تصدیق نہیں کی۔

ہالی ووڈ کی تاریخ کی مقبول ترین کرائم فلموں میں شمار ہونے والی ’ہیٹ‘ کے سیکوئل ’’ہیٹ ۲‘‘ سے متعلق ایک بڑی پیش رفت سامنے آئی ہے، جس نے شائقین کا جوش مزید بڑھا دیا ہے۔ دی ریپ کی رپورٹ کے مطابق، آسکر ایوارڈ یافتہ اداکار لیونارڈو ڈی کیپریو اور کرسچن بیل نے فلم میں مرکزی کردار ادا کرنے کے لیے معاہدے کر لیے ہیں۔ رپورٹ میں دعویٰ کیا گیا ہے کہ ڈی کیپریو کرس شیہرلس جبکہ کرسچن بیل ونسنٹ ہنا کے کردار میں نظر آئیں گے۔ رپورٹ کے مطابق دونوں اداکاروں کے ساتھ معاہدوں کو حتمی شکل دینے میں تقریباً ایک سال تک مذاکرات جاری رہے۔ تاہم صورتحال مکمل طور پر واضح نہیں کیونکہ دی ریپ سے بات کرنے والے دو ذرائع نے معاہدوں کو مکمل قرار دیا، جبکہ دو دیگر ذرائع کا کہنا تھا کہ بات چیت ابھی آخری مراحل میں ہے۔

یہ بھی پڑھئے:’’حالات کیسے بھی ہوں، میں پُرسکون رہنے کی کوشش کرتی ہوں‘‘

دوسری جانب امیزون ایم جی ایم اسٹوڈیوز کے نمائندے نے واضح کیا ہے کہ دونوں اداکاروں کے ساتھ معاہدوں کو ابھی باضابطہ طور پر حتمی شکل نہیں دی گئی۔ اگر یہ کاسٹنگ مکمل ہو جاتی ہے تو لیونارڈو ڈی کیپریو اور کرسچن بیل ان کرداروں کو نبھائیں گے جنہیں ۱۹۹۵ء کی اصل فلم میں بالترتیب ویل کلمر اور ال پچینو نے امر بنا دیا تھا۔ اصل فلم میں رابرٹ ڈی نیرو، ال پچینو، ویل کلمر، نٹالی پورٹمین اور ایشلے جڈ سمیت کئی بڑے ستارے شامل تھے، جبکہ نئی فلم بھی ایک شاندار اسٹار کاسٹ کے ساتھ آگے بڑھتی دکھائی دے رہی ہے۔
رپورٹ میں یہ بھی بتایا گیا ہے کہ ایڈم ڈرائیور منفی کردار اوٹس وارڈیل کے لیے اعلیٰ سطح کی بات چیت کر رہے ہیں، جبکہ حال ہی میں ایمی ایوارڈ جیتنے والے اسٹیفن گراہم کو نیل میک کالے کے کردار کے لیے زیر غور لایا جا رہا ہے، جسے اصل فلم میں رابرٹ ڈی نیرو نے ادا کیا تھا۔ خاتون مرکزی کردار چارلین شیہرلس کے لیے بھی متعدد اداکاراؤں کے ناموں پر غور کیا جا رہا ہے، تاہم ابھی کسی کے نام کا باضابطہ اعلان نہیں کیا گیا۔ اس کے علاوہ ڈیڈ لائن کی ایک سابقہ رپورٹ کے مطابق اداکار جیسن کلارک بھی فلم میں ایک اہم لیکن تاحال نامعلوم کردار کے لیے زیر غور ہیں۔

یہ بھی پڑھئے:ٹیلی گرام پر مرکز مزید سخت، پائریٹیڈ فلم اور او ٹی ٹی مواد فوراً ہٹانے کی ہدایت

’’ہیٹ ۲‘‘، مائیکل مان کے ۲۰۲۲ء میں شائع ہونے والے ناول پر مبنی ہے، جو نہ صرف ۱۹۹۹۵ء کی فلم کا سیکوئل ہوگا بلکہ اس میں اصل فلم سے پہلے پیش آنے والے واقعات کو بھی دکھایا جائے گا، جس کے باعث اسے بیک وقت پریکوئل اور سیکوئل قرار دیا جا رہا ہے۔ فلم کی تیاری گزشتہ چند برسوں سے جاری ہے، تاہم امیزون ایم جی ایم اسٹوڈیوز کی شمولیت کے بعد اس منصوبے میں تیزی آئی ہے۔ لیونارڈو ڈی کیپریو اور کرسچن بیل کے اس منصوبے کا حصہ بننے کی افواہیں کئی ماہ سے گردش کر رہی تھیں، لیکن اب پہلی مرتبہ معتبر ذرائع نے ان دعوؤں کی تفصیلات سامنے لائی ہیں، اگرچہ اسٹوڈیو نے ابھی تک باضابطہ اعلان نہیں کیا۔
رپورٹس کے مطابق اگر تمام معاہدے طے پا جاتے ہیں تو ’’ہیٹ ۲‘‘ کی شوٹنگ رواں سال نومبر میں شروع ہونے کا امکان ہے، جبکہ فلم کی ریلیز سے متعلق ابھی کوئی سرکاری تاریخ جاری نہیں کی گئی۔