دنیا کے سب سے بلند ہوٹل، سیل دبئی مرینا کی جانب سے یو اے ای کے شہر دبئی میں دنیا بھر کے مہمانوں کیلئے اپنے دروازے کھول دیے گئے ہیں۔

دنیا کے سب سے بلند ہوٹل، سیل دبئی مرینا کی جانب سے یو اے ای کے شہر دبئی میں دنیا بھر کے مہمانوں کیلئے اپنے دروازے کھول دیے گئے ہیں۔ بین الاقوامی خبر رساں ادارے کی رپورٹ کے مطابق یہ ہوٹل دبئی مرینا، پام جمیرا اور عربین گلف کے شاندار۳۶۰؍ ڈگری مناظر پیش کرتا ہے۔  لندن میں مقیم آرکیٹیکٹ این او آر آر گروپ کی جانب سے اس شاندار عمارت کی ڈیزائننگ کی گئی ہے، جو۱۲۳۶ء۸۸؍ فٹ بلند ہے اور عالمی ریکارڈ کے مطابق یہ دنیا کا سب سے بلند ترین ہوٹل ہے۔  رپورٹس کے مطابق پروجیکٹ کے ڈویلپر فرسٹ گروپ کے سی ای او رابرٹ برنز کا کہنا تھا کہ اس بلند ترین ہوٹل کی تعمیر کا منصوبہ پہلے سے نہیں تھا۔  اُنہوں نے کہا کہ ہم چاہتے تھے کہ کچھ شاندار تعمیر کریں، مگر سب سے بلند ہوٹل بنانے کا ارادہ نہیں تھا۔ انسٹاگرام پر سیل دبئی مرینا نے اعلان کیا کہ آج ہم فخر کے ساتھ دنیا کے سب سے بلند ہوٹل کے کھلنے کا اعلان کرتے ہیں، جو دبئی مرینا کے دل میں ایک شمع کی مانند روشن ہوگا۔ یہ ہوٹل صرف عمارت نہیں بلکہ جدت، عزم اور خوابوں کو حقیقت میں بدلنے کی علامت ہے۔