یمن کے حوثی آرمی چیف اسرائیلی حملے میں شہید ہوگئے، گروپ نے میجر جنرل محمد الغماری کی شہادت کی تصدیق کرتے ہوئے انتقام کی دھمکی دی۔

یمن کے حوثی آرمی چیف اسرائیلی حملے میں شہید ہوگئے، گروپ نے میجر جنرل محمد الغماری کی شہادت کی تصدیق کرتے ہوئے انتقام کی دھمکی دی۔ ’الجزیرہ ‘ کی رپورٹ کے مطابق فوجی بیان میں کہا گیا کہ میجر جنرل محمد الغماری دشمن اسرائیل کے خلاف ایک باعزت جنگ میں مارے گئے، تاہم، مزید تفصیلات فراہم نہیں کی گئیں۔ ان کی شہادت کا اعلان ایسے وقت میں کیا گیا ہے جب۲؍ سالہ غزہ جنگ میں جنگ بندی کو چند ہی دن گزرے ہیں، جس دوران حوثیوں نے بارہا اسرائیلی اہداف اور بحیرہ احمر میں کارگو جہازوں کو نشانہ بنایا تھا۔ حوثی بیان کے مطابق میجر جنرل محمد الغماری اپنے چند ’ساتھیوں ‘ اور اپنے۱۳؍ سالہ بیٹے کے ساتھ شہید ہوئے، تاہم، حملے کی تاریخ نہیں بتائی گئی۔ 
اسرائیلی فوج کے مطابق ستمبر کے آخر میں یمن پر کئے گئے آخری بڑے فضائی حملے میں حوثیوں کے جنرل اسٹاف ہیڈکوارٹرز کو بھی نشانہ بنایا گیا تھا۔ تاہم، اسرائیلی وزیرِ دفاع اسرائیل کاٹز نے جمعرات کو سوشل میڈیا پلیٹ فارم ’ایکس‘ پر لکھا کہ محمد الغماری اپنے زخموں کے باعث چل بسے، ان کے مطابق یہ وہی حملہ تھا جو اگست میں کیا گیا تھا، جس میں حوثی وزیرِاعظم اور ان کی کابینہ کا نصف حصہ مارا گیا تھا۔ اسرائیلی وزیرِاعظم بنجامن نیتن یاہو نے کہا کہ محمد الغماری ’ان دہشت گرد کمانڈروں میں شامل تھے جو ہمیں نقصان پہنچانا چاہتے تھے، ہم ان سب تک پہنچیں گے۔ 
ایران کے ’محورِ مزاحمت‘ میں شامل حوثی گروپ نے غزہ جنگ کے دوران اسرائیلی اور امریکی افواج کے ساتھ متعدد بار حملوں کا تبادلہ کیا، بیان میں کہا گیا کہ انہوں نے اپنی مہم کے دوران۷۵۸؍ فوجی کارروائیاں کیں اور۱۸۳۵؍ہتھیار، بشمول ڈرون اور میزائل استعمال کئے۔ بیان میں مزید کہا گیا کہ ’دشمن کے ساتھ تصادم کے ادوار ختم نہیں ہوئے، اور صہیونی دشمن کو اپنے کئےگئے جرائم کی بازپرس اور سزا ملے گی۔ حوثیوں نے غزہ جنگ کے آغاز میں فلسطینیوں سے اظہار یکجہتی کرتے ہوئے بحیرہ احمر اور خلیج عدن کے مصروف تجارتی راستے پر اسرائیل سے منسلک جہازوں پر حملے شروع کئے تھے، ان کے بار بار کئے گئے ڈرون اور میزائل حملوں کے جواب میں اسرائیل نے شدید فضائی کارروائیاں کیں، جن میں اگست کا وہ حملہ بھی شامل تھا جس میں وزیرِاعظم اور دیگر۱۱؍ سینئر اہلکار ہلاک ہوئے تھے۔ 
امریکی صدر ڈونالڈ ٹرمپ کے جنوری میں دوبارہ اقتدار میں آنے کے بعد امریکہ کی ۷؍ ہفتے طویل بمباری کے نتیجے میں حوثیوں کے مطابق۳۰۰؍ افراد مارے گئے۔ حوثی، جو یمن کے شمالی پہاڑی علاقے سے تعلق رکھتے ہیں، گزشتہ ایک دہائی سے دارالحکومت صنعا سمیت ملک کے بڑے حصے پر قابض ہیں۔ ۲۰۱۵ء کے اوائل میں سعودی قیادت میں بین الاقوامی اتحاد کی جانب سے کئے گئے حملے بھی انہیں ہٹانے میں ناکام رہے، جبکہ اس جنگ نے عرب دنیا کے غریب ترین ملک یمن کو ایک بڑے انسانی بحران سے دوچار کر دیا۔ حوثیوں نے براہِ راست اسرائیل پر محمد الغماری کی شہادت کا الزام نہیں لگایا، لیکن کہا کہ اسرائیل کے ساتھ جنگ ختم نہیں ہوئی اور وہ ’اپنے جرائم کی بازدارانہ سزا‘ پائے گا۔ گزشتہ اگست میں اسرائیل نے صنعا میں فضائی حملوں کے دوران حوثی گروپ کے چیف آف اسٹاف، وزیرِ دفاع اور وزیرِاعظم کو نشانہ بنایا تھا، اس وقت اسرائیل نے کہا تھا کہ حملے کا ہدف محمد الغماری سمیت دیگر سینئر اہلکار تھے۔