فرینچ پولی نیشیائی جزیروں کے چھوٹےسے گروپ پر مبنی ملک ساموا کےبلے باز ڈیریوس ویس نے یہ کارنامہ انجام دیا، ایک اوور میں ۶؍ چھکے بھی لگائے۔

 ابن صفی نے اپنے عمران سیریز کے ناول ’کنگ چانگ ‘سے لے کر’ بلیک اینڈ وہائٹ‘ تک میں فرینچ پولی نیشیائی جز یروں کا ذکر کیا ہے۔ ہر چند کہ وہ کہانیاں ہیں لیکن جزیرے اصل میں موجود ہیں اور انہی جزیروں میں سے ایک ساموا کے دائیں ہاتھ کے بلے باز  ڈیریوس ویس نے پڑوسی جزیرے وانواتو کے خلاف ٹی ۲۰؍ ورلڈ کپ ایسٹ ایشیا پیسیفک ریجن کے کوالیفائر میچ میں ریکارڈ توڑ اننگز کھیلتے ہوئے  ایک ہی اوور میں ۳۹؍ رن بناڈالے۔ اس طرح سے انہوں نے یوراج سنگھ کا ایک ہی اوور میں ۳۶؍ رن بنانے کا ریکارڈ توڑ دیا۔  ڈیریویس ویس نے ایک ہی اوور میں ۶؍ چھکوں کے ساتھ ٹیم کے کھاتے میں ۳۹؍ رن جوڑنے کا شاندار کارنامہ انجام دیا۔
  اس اوور میں تین نو بال بھی ڈالے گئے جس کی وجہ سے یہ اسکور  اتنا زیادہ بن سکا ۔  یہ کارنامہ ساموا کی اننگز کے ۱۵؍ویں اوور میں ہوا جب نالن نپیکو نے اوور شروع کیا تو ویس نے ڈیپ مڈ وکٹ پر ان کی پہلی تین گیندوں پرمسلسل  ۳؍چھکے لگائے۔ اس کے فوراً بعد نپیکو نے فرنٹ فٹ نو بال کی اور فری ہٹ پر ویس نے لیگ سائیڈ پر چھکا لگادیا۔ تاہم اگلی گیند خالی رہی اور نان اسٹرائیکر  اینڈ پر  اسٹمپ سے ٹکرا گئی۔ نپیکو نے ایک بار پھر اوور اسٹیپ کیا اور اگلی ہی گیند پر انہوں نے کمر سے اوپر کی نو بال پھینکی جسے ویس نے فائن لیگ پر پل کرکے باؤنڈری لائن  پار کرا دی۔ اوور کی آخری گیند لیگ اسٹمپ کے باہر فل ٹاس تھی جس پر ویس نے اسکوائر لیگ پر چھکا لگایا۔ اس کے علاوہ ویس نے اس میچ میں  دیگر  ریکارڈ بھی توڑے۔ ویس ٹی ۲۰؍میں سنچری بنانے والے ساموا کے پہلےبلے باز بن گئے ہیں۔ انہوں نے اپنی اننگز میں ۱۴؍ چھکے لگائے جو کسی بلے باز کی جانب سے ایک اننگز میں سب سے زیادہ چھکوں کی فہرست میں پانچویں نمبر پر ہے۔ ٹیم کی طرف سے بنائے گئے کل ۱۷۴؍رن میں سے ویس کے ۱۳۲؍ رن تھے جو کہ کسی بلے باز کی جانب سے ٹی ٹوینٹی اننگز میں ٹیم کے رن کے مقابلے میں سب سے زیادہ رن ہیں۔

ویس نے ساموا کے کل رنوں کے ۷۵ء۸۶؍ فیصد رن بنائے۔ اس سے قبل یہ ریکارڈ آسٹریلیا کے دھماکے دار بلے باز ایرون فنچ  کے نام تھا جنہوں نے  ۷۵ء۱؍ فیصدرن بنائے تھے۔ اس کے ساتھ ہی ویس نے اس فارمیٹ میں پانچ مرتبہ ایک اوور میں بنائے گئے ۳۶؍رن کے اعداد و شمار کو پیچھے چھوڑ دیا۔ ساموا نے یہ میچ ۱۰؍ رن سے جیتا اور ویس نے بولنگ کرتے ہوئے ایک وکٹ بھی حاصل کی۔ قابل ذکر ہے کہ اگر ہم ایک ہی اوور میں  ۶؍چھکے لگانے کی بات کریں تو یہ کارنامہ پہلے بھی پانچ مرتبہ انجام دیا جاچکا ہے۔ ۲۰۰۷ءمیں ہندوستان کے یوراج سنگھ یہ کارنامہ انجام دینے والے پہلے بلے باز تھے جنہوں نے انگلینڈ کے اسٹورٹ براڈ کے ایک اوور میں چھ چھکے لگائے تھے۔ اس کے بعد ویسٹ انڈیز کے کیرون پولارڈ نے۲۰۲۱ء میں سری لنکا کے خلاف ایک ہی اوور میں چھ چھکے لگائے تھے اور نیپال کے دپندر سنگھ ایری نے اسی سال  ایک ہی اوور میں چھ چھکے لگائے تھے۔ دیگر دو مواقع پر ایک اوور میں چھ چھکے نہیں لگے لیکن اضافی گیندوں کی مدد سے ٹیم کے اسکور میں ایک اوور میں ۳۶؍ رن کا اضافہ ہوا تھا۔ یہ ریکارڈ ویسٹ انڈیز کی اننگز میں نکولس پورن کی ٹی ٹوینٹی ورلڈ کپ ۲۰۲۴ء میں افغانستان کے خلاف بیٹنگ کے دوران بنایا گیا تھا۔ یہ کارنامہ افغانستان کے خلاف ہندوستانی کپتان روہت شرما اور رنکو سنگھ ۲۰۲۴ء میں ہی ایک ساتھ انجام دے چکے ہیں۔  یوراج سنگھ کا یہ ریکارڈ ۲۰۰۷ء سے اب تک قائم تھا اور اس کے ٹونے کی امید بھی بہت کم تھی لیکن ایک غیر معروف ٹیم کے بلے باز نے یہ ریکارڈ توڑ دیا۔