افغانستان کی کرکٹ ٹیم اسٹار لیگ اسپنر راشد خان کی قیادت میں آئندہ ایشیا کپ میں کھیلے گی۔افغانستان کرکٹ بورڈ (اے سی بی) نے منگل کو متحدہ عرب امارات میں۹؍ سے۲۸؍ستمبر تک کھیلے جانے والے  ایشیا کپ کیلئے ۲۲؍رکنی ٹیم کا اعلان کیا۔

 افغانستان کی کرکٹ ٹیم اسٹار لیگ اسپنر راشد خان کی قیادت میں آئندہ ایشیا کپ میں کھیلے گی۔افغانستان کرکٹ بورڈ (اے سی بی) نے منگل کو متحدہ عرب امارات میں۹؍ سے۲۸؍ستمبر تک کھیلے جانے والے  ایشیا کپ کیلئے ۲۲؍رکنی ٹیم کا اعلان کیا۔ اے سی بی کی سلیکشن کمیٹی کے رکن میر مبارز نے کہا ’’راشد خان افغانستان کے سپر اسٹار ہیں، انہوں نے ہمیشہ ٹیم کے لیے اچھی کارکردگی کا مظاہرہ کیا ہے۔ فارم میں ہونا یا آؤٹ آف فارم ہونا کھیل کا حصہ ہے، لیکن وہ اچھی طرح جانتے ہیں کہ کس طرح مضبوطی سے واپس آ کر بڑے ٹورنامنٹس میں ٹیم اور ملک کیلئے اچھی کارکردگی کا مظاہرہ کرنا ہے۔‘‘مبارز نے کہا کہ ہم نے سہ رخی سیریز اور ایشیا کپ سے قبل تیاری کے کیمپ کے لیے ابتدائی ٹیم کا اعلان کر دیا ہے ۔کیمپ کے دوران کوچنگ اسٹاف اور کپتان دونوں کی جانب سے نئے کھلاڑیوں کا تجزیہ کیا جائے گا۔ان کا کہنا تھا کہ اگر انہیں انجری کے باعث اپنا پلان تبدیل نہیں کرنا پڑا تو وہ ابتدائی کیمپ کے ۲۲؍ کھلاڑیوں میں سے ہی  اپنی ورلڈ کپ ٹیم کا انتخاب کریں گے۔ٹیم میں شامل  تیز گیندبازوں کے بارے میں ان کا کہنا تھا کہ’’ہاں، ہم شاید آئندہ ایشیا کپ میں انہی ۲۲؍کھلاڑیوں کے ساتھ جائیں گے، لیکن انجری کی صورت میں تبدیلیاں ہو سکتی ہیں اور ہم وقت کے ساتھ ان باتوں کا خیال رکھیں گے، ہم نے ٹیم میں عبداللہ احمد زئی، بشیر احمد کو شامل کیا ہے اور سلیم صافی بھی انجری کے بعد واپسی کر رہے ہیں۔