فرنچ اوپن میں جرمنی کے کھلاڑی نے پہلا سیٹ جیت لیا تھا لیکن دوسرے سیٹ میں گریکسپور زخمی ہوگئے او روہ میچ ادھورا چھوڑکر باہر ہوگئے۔

الیگزینڈر زیوریو نے رولا گیروس یعنی فرنچ اوپن کے کوارٹر فائنل میں اپنی جگہ اس وقت محفوظ کر لی جب ان کے حریف ٹیلن گریکسپور میچ کے دوران پیٹ کی چوٹ کے ساتھ ریٹائرڈ ہو گئے۔ زیوریو نے میچ میں۴۔۶، ۰۔۳؍ سے برتری حاصل کرلی تھی  لیکن گریکسپور نے اپنی سروس کے ساتھ جدوجہد کی اور۵۴؍ منٹ کے کھیل کے بعد ریٹائرڈ ہونے کا فیصلہ کیا۔ ہالینڈ کے کھلاڑی نے پہلے سیٹ میں۰۔۳؍ کی برتری حاصل کرتے ہوئے مضبوط آغاز کیا تھا، لیکن جیسے جیسے میچ آگے بڑھتا گیا، ان کی محدود سروسنگ پاور نے اعلیٰ سطح پر مقابلہ کرنا ناممکن بنا دیا۔ ’’بدقسمتی سے، آج صبح اور وارم اپ کے دوران، میں نے اپنے پیٹ کے پٹھوں میں تناؤ محسو س کیا، جس کا مطلب تھا کہ میں صحیح طریقے سے سروس نہیں کر سکتا یا جس طرح سے کھیلنا چاہتا تھانہیں کھیل سکتا تھا۔ ‘‘ ہالینڈ کے ٹینس کھلاڑی گریکسپور نے میچ کے بعد کہا۔ میچ سے پہلے ان کا ایک سکین کروایا گیا لیکن انجری کے وقت کی وجہ سے نتائج بے نتیجہ رہے۔یہ تازہ ترین مقابلہ دونوں کھلاڑیوں کے درمیان جاری دشمنی کا حصہ تھا۔ اس سال کے شروع میں، گریکسپور نے انڈین ویلز میںجرمنی کے کھلاڑی  زیوریو کے خلاف اپ سیٹ کامیابی حاصل کی تھی اس سے پہلے  جرمن کھلاڑی نے میونخ میں اپنا بدلہ لیا، جہاں انہوں نے آخر کار خطاب جیت لیا۔  

روہن بوپنا اور یوکی بھامبری فرنچ اوپن سے باہر
ہندوستان کے روہن بوپنا اور ان کے ساتھی چیک جمہوریہ  کے ایڈم پاولاسیک اتوارکو مردوں کے ڈبلز میچ کے تیسرے راؤنڈ میں شکست کے بعد فرنچ اوپن۲۰۲۵ء سے باہر ہو گئے۔ دوسری جانب یوکی بھامبری اور ان کے جوڑی دار امریکہ کے رابرٹ گیلوے بھی میچ ہار گئے۔ اس کے ساتھ ہی ٹورنامنٹ میں ہندوستان کی مہم ختم ہوگئی۔اتوار کو یہاں کھیلے گئے میچ میں برطانیہ کے سیکنڈ سیڈ ہنری پیٹن اور فن لینڈ کے ہیری ہیلیواارا کی جوڑی نے بوپنا-پاولاسیک کی جوڑی کو ایک گھنٹہ۱۱؍ منٹ تک جاری رہنے والے  میچ میں۲۔۶، ۶۔۷؍ سے شکست دی۔ دوسری جانب، ہندوستان کے نمبر ایک ڈبلز کھلاڑی یوکی بھامبری اور رابرٹ گیلووے کو امریکہ کے کرسچن ہیریسن اور کنگ کی ۹؍ویں  سیڈ جوڑی سے۴۔۶، ۴۔۶؍   سے شکست کا سامنا کرنا پڑا۔   بوپنا اور بھامبری کے باہر ہونے کے ساتھ ہی سال کے دوسرے گرینڈ سلیم میں ہندوستان کا چیلنج ختم ہو گیا ہے۔